3 வாரங்களில் 2 பைக் மீட்பு - மீட்டு கொடுத்த காவலருக்கு பாராட்டு

சென்னை எஸ்பிளனேடு  காவல் நிலையத்தில் ஆயுதப்படை காவலராக பணியாற்றிவருபவர் தனசேகர். இவர் நேற்று  மாலை சென்னை கோட்டை ரயில் நிலையம் அருகே ரோந்து பணியில் ஈடுபட்டிருந்தபோது, சந்தேகப்படும்படியான நபர் ஒருவரை பார்த்துள்ளார். அவரிடம் விசாரணை செய்ய நெருங்கியபோது, அந்த மர்ம நபர் தப்பி ஓடியுள்ளார். இதையடுத்து அவரது இருசக்கரவாகனத்தை சோதனை செய்த காவலர், தனசேகர், அது திருட்டு பைக் என்பதை கண்டுபிடித்தார். இதுகுறித்து, பைக் உரிமையாளர் இரண்டு தினங்களுக்கு முன்பு, எஸ்பிளனேடு காவல் நிலையத்தில் புகார் கொடுத்தது தெரிய வந்துள்ளது.  இதையடுத்து எஸ்பிளனேடு காவல் நிலைய ஆய்வாளர் மேற்பார்வையில் பைக் உரிமையாளரின் ஆவணங்களை சரிபார்த்து பைக்கினை அதன் உரிமையாளரிடம் ஆயுதப்படை காவலர் தனசேகர்  ஒப்படைத்தார். இதேபோல, கடந்த 20 நாட்களுக்கு முன், திருட்டு பைக் ஒன்றை காவலர் தன சேகர் மீட்டு கொடுத்துள்ளார். 3 வாரங்களில், 2 திருட்டு பைக்குகளை கண்டுபிடித்து கொடுத்த காவலர் தனசேகரை உயர் அதிகாரிகள் மற்றும் பொதுமக்கள் பாராட்டி வருகின்றனர்.