சென்னை விமான நிலையத்தில் 3.4 கிலோ தங்கம் பறிமுதல்
கோவை, துபாய் மற்றும் குவைத்தில் இருந்து கடத்தி வரப்பட்ட 3 கிலோ 400 கிராம் தங்கத்தை சுங்கத்துறை அதிகாரிகள் பறிமுதல் செய்துள்ளனர்.
சென்னைக்கு வெளிநாடுகளில் இருந்து பெரும் அளவில் தங்கம் கடத்தி கொண்டு வரப்படுவதாக விமான நிலைய சுங்க இலாகா அதிகாரிகளுக்கு ரகசிய தகவல் கிடைத்துள்ளது. கோவையில் இருந்து வந்த விமானத்தில் வந்த இலங்கையை சேர்ந்த முகமது ரேலி என்பவரிடம் இருந்த 14 தங்க கட்டிகளை போலீசார் பறிமுதல் செய்தனர். இதன் மதிப்பு 52 புள்ளி 50 லட்சம் என அதிகாரிகள் தெரிவித்தனர். இதேபோன்று குவைத் விமானத்தில் வந்த சென்னையை சேர்ந்த இளைஞர் கடத்தி வந்த 300 கிராம் தங்கம், மேலும் துபாயில் இருந்து வந்த பயணி கடத்தி வந்த ஒன்றரை கிலோ தங்க கட்டியையும் பறிமுதல் செய்த சுங்க அதிகாரிகள் 3 பேரையும் பிடித்து விசாரணை நடத்தி வருகின்றனர்.