மோடியின் பிரதமர் நாற்காலியில் நிதின் கட்கரி? - வெளிவந்த அதிர்ச்சி உண்மை

பிரதமராகும் வாய்ப்பை நிராகரித்ததாக மத்திய அமைச்சர் நிதின் கட்கரி பேசியிருப்பது தேசிய அரசியலில் கவனம் பெற்றிருக்கிறது.மகாராஷ்டிரா மாநிலம் நாக்பூரில் பத்திரிக்கையாளர்களுக்கு விருது வழங்கும் விழாவில் பேசிய நிதின் கட்கரி, சமீபத்தில் நடந்ததை நினைவுகூறுவதாக பேசினார். யாருடைய பெயரையும் குறிப்பிட போவது இல்லை என்றவர், எதிர்க்கட்சியை சேர்ந்த நபர் என்னிடம் நீங்கள் பிரதமர் ஆனால், உங்களுக்கு ஆதரவு அளிப்போம் என்றார். அப்போது நீங்கள் ஏன் எனக்கு ஆதரவு தர வேண்டும்? உங்களது ஆதரவை நான் ஏன் பெற வேண்டும் என்று அவரிடம் கேட்டதாக நிதின் கட்கரி தெரிவித்தார். என்னுடைய வாழ்வில் பிரதமர் ஆக வேண்டும் என்பது என்னுடைய நோக்கம் இல்லை என்று தெரிவித்ததாகவும் நிதின் கட்கரி குறிப்பிட்டுள்ளார். என்னுடைய அமைப்புக்கு விசுவாசத்துடன் இருக்கிறேன், அதில் எந்தவொரு பதவிக்காகவும் நான் சமரசம் செய்து கொள்ள போவதில்லை, ஏனென்றால் என்னுடைய மனவுறுதியே எனக்கு முக்கியம் என்று கூறியதாக நிதின் கட்கரி தெரிவித்துள்ளார்.