"தடுப்பூசி வரும் வரை கடுமையாக போராட வேண்டும்" - பிரதமர் நரேந்திர மோடி

2024 - ஆம் ஆண்டுக்குள் நமது நாட்டில் அனைத்து கிராம புற வீடுகளுக்கும் பாதுகாப்பான குடிநீரை வழங்க வேண்டும் என்பதை இலக்காக கொண்டு மத்திய அரசு ஜல் ஜீவன் திட்டத்தை தொடங்கி செயல்படுத்தி வருகிறது. அதன் ஒரு பகுதியாக மத்திய அரசு, ஆயிரத்து 185 குடியிருப்புகளில் உள்ள ஒரு லட்சத்து 42 ஆயிரத்து 749 வீடுகளுக்கு, குடிநீர் குழாய் இணைப்புகளை அளிப்பதற்காக மணிப்பூர் மாநிலத்திற்கு நிதியுதவி அளித்துள்ளது. இந்த திட்டத்தை துவக்கி வைத்த பின்னர் காணொலி வழியாக, பேசிய பிரதமர் நரேந்திர மோடி, கொரோனாவின் இந்த நெருக்கடியில் கூட, நாடு நிற்கவில்லை,நிறுத்தப்படவில்லை என்பதற்கு இன்றைய திட்டம் ஒரு எடுத்துக்காட்டு என கூறினார். தடுப்பூசி வரும் வரை, கொரோனாவுக்கு எதிராக நாம் கடுமையாக போராட வேண்டியிருக்கும், என்றும், அபிவிருத்தி பணிகளை முழு பலத்துடன் முன்னெடுக்க வேண்டும் என்றும் பிரதமர் நரேந்திர மோடி குறிப்பிட்டார்.