"இன்று புதிதாக பிறந்திருக்கிறேன்" - திமுக தலைவராக பொறுப்பேற்ற ஸ்டாலின் பேச்சு...

திமுக தலைவர் கருணாநிதி மறைவுக்கு பிறகு, அக்கட்சியின் பொதுக்குழு கூட்டம் முதல்முறையாக, சென்னை அண்ணா அறிவாலயத்தில் உள்ள கலைஞர் அரங்கில் நடைபெற்றது. இதில் திமுகவின் 65 மாவட்ட செயலாளர்கள் மற்றும் பொதுக்குழு மற்றும் செயற்குழு உறுப்பினர்கள் அனைவரும் கலந்து கொண்டனர். கூட்டம் தொடங்கியதும், மேடையில் அமர்ந்திருந்த அக்கட்சியின் பொதுச்செயலாளர் க.அன்பழகன், கட்சியின் தலைவர் மற்றும் பொருளாளர் பதவிகளுக்கு தேர்ந்தெடுக்கப்பட்டவர்களுக்கான அறிவிப்பை வெளியிட்டார். அப்போது, திமுக தலைவராக, செயல் தலைவர் ஸ்டாலினும், பொருளாளர் பதவிக்கு துரைமுருகனும் போட்டியின்றி தேர்ந்தெடுக்கப்படுவதாக, அறிவித்தார். அப்போது, திமுகவினர் கைதட்டியும், கரகோஷம் எழுப்பியும் வரவேற்றனர். இதனைத் தொடர்ந்து, ஸ்டாலினுக்கு, கட்சியின் முன்னணி தலைவர்களும், நிர்வாகிகளும் கைகொடுத்து வாழ்த்து தெரிவித்தனர். அவர்களது வாழ்த்துக்களை ஏற்றுக்கொண்ட அவரை, கட்சியினர் மேடைக்கு அழைத்துச்சென்றனர். அங்கு அண்ணா மற்றும் கருணாநிதியின் உருவப்படங்களுக்கு ஸ்டாலின் மரியாதை செலுத்தினார்.