அமலாக்கத்துறை வழக்கில் முன்ஜாமீன் கோரி சிதம்பரம் மனு - ஊடகங்களுக்கு தகவல்களை கசிய விட்டதாக கபில்சிபல் குற்றச்சாட்டு

உயர்நீதிமன்றத்தில் மூடி முத்திரையிடப்பட்ட உறையில் அமலாக்கத் துறை அளித்த ஆவணங்களில் என்ன இருக்கிறது என தெரியாத நிலையில், எப்படி வாதிட முடியும் என கபில்சிபல் கேள்வி எழுப்பினார்.

இந்த வழக்கில் தொடர்புடைய ஆவணங்களை அமலாக்கத்துறை ஊடகங்களுக்கு கசிய விட்டதாக  கபில்சிபல் குற்றம்சாட்டிய நிலையில், குறுக்கிட்ட சொலிசிட்டர் ஜெனரல்  துஷார் மேத்தா அதன மறுத்தார். மேலும், ப.சிதம்பரம் வழக்கறிஞர்களுக்கு அளித்த போது தான், தகவல்கள் ஊடகங்களுக்கு கசிந்ததாகவும் அவர் தெரிவித்தார்.

அமலாக்கத் துறையின் வழக்கு குறிப்பேட்டை ஆவணமாக  கொள்ள முடியாது என்று கபில்சிபல் தெரிவித்த போது, குறுக்கிட்ட துஷார் மேத்தா, சிதம்பரத்துக்கு எதிரான ஆதாரங்களை அமலாக்கத்துறை வைத்துள்ளது என்றும், வழக்கு குறிப்பேடு தேவையில்லை என்றும் கூறினார். ஐ.என்.எக்ஸ். மீடியா வழக்கில் மூடி முத்திரையிடப்பட்ட  உறையில், சொலிசிட்டர் ஜெனரல் ஆவணங்கள் அளித்தது நடைமுறைக்கு எதிரானது என்றும், இந்த வழக்கில் முதல் தகவல் அறிக்கை பதிவு செய்த நாளுக்கும், சிதம்பரத்தை கைது செய்த நாளுக்கும் இடையே ஏதாவது புதிய ஆவணங்களை கைப்பற்றி இருந்தால், அது தொடர்பாக சிதம்பரத்திற்கு அமலாக்கத்துறை சம்மன் அளித்து விசாரித்து இருக்க வேண்டும் என்றும் வாதிட்டார்.

சி.பி.ஐ. காவலில் இருக்கும் போது ட்விட்டர் கணக்கை பயன்படுத்துகிறீர்களா என்பது போன்ற கேள்வியை  சிதம்பரத்திடம் கேட்டுள்ளனர்  என்றும், இதுவே அவரிடம் நடத்தப்படும் விசாரணையின் போக்கையும், தரத்தையும்  காட்டுவதாக கபில் சிபல் வாதிட்டார்.  உணவு இடைவேளைக்கு பின்னர் மீண்டும் வழக்கு பிற்பகல் விசாரணைக்கு வருகிறது.