உலகப் புகழ்பெற்ற கேன்ஸ் திரைப்பட விழா - பிரான்சில் கோலாகலத் துவக்கம்

பிரான்ஸ் நாட்டில் கேன்ஸ் திரைப்பட விழா கோலகலமாக துவங்கியுள்ள நிலையில், நடிகையும் இயக்குநருமான ஜோடி ஃபாஸ்டருக்கு உயரிய பால்ம் டோர் விருது வழங்கப்பட்டது.உலக புகழ்பெற்ற கேன்ஸ் திரைப்பட விழா ஒவ்வொரு ஆண்டும் மே மாதம் பிரான்ஸ் நாட்டின் கேன்ஸ் நகரில் நடைபெறும். கடந்த ஆண்டு கொரோனா பரவல் காரணமாக கேன்ஸ் திரைப்பட விழா ரத்து செய்யப்பட்ட நிலையில், இந்த ஆண்டு 2 மாதங்களுக்கு ஒத்திவைக்கப்பட்டது. இதையடுத்து நேற்று உற்சாகமாக  துவங்கிய 74-வது கேன்ஸ் திரைப்பட விழா வரும் 17ம் தேதி வரை நடைபெற உள்ளது. மேலும் இதில் குறைவான நபர்களே நேரடியாக கலந்து கொள்ள உள்ளனர். இந்நிலையில், புகழ்பெற்ற நடிகையும் இயக்குநருமான ஜோடி ஃபாஸ்டருக்கு மிக உயர்ந்த பால்ம் டோர் விருது வழங்கி கவுரவிக்கப்பட்டது. இவர் தனது 13 வது வயதில் டாக்சி டிரைவர் திரைப்படத்தில் நடித்த போது முதன் முறையாக கேன்ஸ் திரைப்பட விழாவில் கலந்து கொண்டார். இந்நிலையில், வாழ்நாள் சாதனையாளர் விருதைப் பெற்ற தருணத்தில், தன் திரைப்பயணத்தைத் துவங்கிய இந்த அற்புதமான இடத்திற்கு தனது நன்றிகளைத் தெரிவித்துக் கொண்டார்.