`இதுதான் டார்கெட்' ..குறி வைத்து திருடிய திருடனை- தட்டி தூக்கிய போலீஸ்

விழுப்புரம் மாவட்டம் திண்டிவனம் மற்றும் அதனைச் சுற்றியுள்ள பகுதிகளில் உள்ள இரு சக்கரவாகனங்கள் திருடப்பட்டு வந்தது குறித்து போலீசார் தீவிர விசாரணை நடத்தி வந்தனர்.இந்த நிலையில் தனிப்படை காவல்துறை கூட்டேரிப்பட்டு சாலையில் வாகன சோதனையில் ஈடுபட்டனர். அப்போது வாகன சோதனை செய்யும் இடத்தில் நிற்காமல் வேகமாகச் சென்ற இரு சக்கரவாகனத்தை துரத்திச் சென்று பிடித்தனர். போலீசாரின் விசாரணையில் பிடிபட்டவர் திண்டிவனம் ரோசனை பாட்டை பகுதியைச் சேர்ந்த ஆறுமுகம் எனத் தெரியவந்தது. தொடர் விசாரணையில் திண்டிவனம் மற்றும் அதன் சுற்றுவட்டாரப் பகுதி மற்றும் புதுச்சேரியில் ஏராளமான இரு சக்கரவாகனங்களை ஆறுமுகம் திருடி விற்பனை செய்ததும் தெரியவந்துள்ளது. மேலும் ஸ்ப்ளெண்டர் வாகனத்தை மட்டுமே குறிவைத்துத் திருடியதாகவும், அந்த வாகனத்தில் மட்டுமே பூட்டுக்களை எளிதாக உடைக்க முடிவதாக ஆறுமுகம் போலீசாரிடம் கூறி இருக்கிறார்.