நாமக்கல் மாவட்டம் ஜேடர்பாளையத்தில், மினிலோடு வாகனம் மீது லாரி மோதிய விபத்தில் மூன்று பேர் உயிரிழந்தனர்.

பரமத்திவேலூரை அடுத்துள்ள கபிலர்மலையை சேர்ந்த ஓட்டுநரான சாமிநாதன், ஈரோடு அருகே சோழங்கபாளையத்தில் உள்ள திருமண மண்டபத்திற்கு அலங்கார பொருட்களை மினிலோடு வாகனத்தில் ஏற்றிச் சென்றார். பின்னர் அங்கு இறக்கிவைத்து விட்டு நள்ளிரவு கபிலர்மலைக்கு திரும்பினார். அதில், சத்திநாதன், சிவா, பூமிஸ் மற்றும் ரமேஷ் ஆகியோர் பயணம் செய்தனர். கபிலர்மலை அடுத்துள்ள தண்ணீர் பந்தல் அருகே வரும்போது எதிரே வந்த லாரி, எதிர்பாராத விதமாக மோதியது. இதையடுத்து காயமடைந்தவர்களை அக்கம்பக்கத்தினர் மீட்டு பரமத்திவேலூர் அரசு மருத்துவமனைக்கு அனுப்பி வைத்தனர். இதில் சத்திநாதன் ஏற்கனவே இறந்துவிட்டதாக மருத்துவர்கள் தெரிவித்தனர். மற்றவர்கள், நாமக்கல் அரசு மருத்துவ கல்லூரி மருத்துவமனைக்கு சிகிச்சைக்காக அனுப்பி வைக்கப்பட்டனர். இதில், பூமிஸ், சிவா ஆகியோர் சிகிச்சை பலனின்றி உயிரிழந்தனர்.