#JUSTIN | "விசாரணைக்கு சென்றவர் இறப்பு - ரூ.30 லட்சம் இழப்பீடு" - உயர்நீதிமன்ற கிளை உத்தரவு
கடந்த 2012 ஆம் ஆண்டு ராமநாதபுரம் மாவட்டம் எமனேஸ்வரம் காவல் நிலையத்தில் விசாரணைக்காக அழைத்துச் செல்லப்பட்ட வாலிபர் காவலர்களால் தாக்கப்பட்டு இறந்து போன வழக்கில் குடும்பத்திற்கு இழப்பீடு கோரி வழக்கு. காவலர்களால் தாக்கப்பட்டு இறந்து போன மனுதாரரின் குடும்பத்தினருக்கு ரூபாய் 30 லட்சம் இழப்பீடு வழங்க அரசுக்கு உயர் நீதிமன்ற மதுரை கிளை உத்தரவு.
ராமநாதபுரம் மாவட்டம் பரமக்குடியை அடுத்த எமனேஸ்வரம் பகுதியைச் சேர்ந்த செந்தில்குமார், மதுரை ஐகோர்ட்டில் தாக்கல் செய்த மனுவில்,எனது சகோதரர் வெங்கடேசன். இவர் தனது மனைவி உடன் வசித்து வந்தார். இவர் மீது பொய்யாக நகை திருட்டு வழக்கு பதிவு செய்து, இந்த வழக்கில் இருந்து விடுவிக்க போலீசார் தொடர்ந்து பணம் கேட்டு மிரட்டி வந்தனர். பின்னர் 2012 ஆம் ஆண்டில் வெங்கடேசனை எமனேஸ்வரம் போலீசார் சட்டவிரோத காவலில் வைத்து விசாரித்தனர். அப்போது அவரை கடுமையாக தாக்கியுள்ளனர். இதில் போலீஸ் நிலையத்திலேயே அவர் இறந்தார்.அவரது உடல் அரசு ஆஸ்பத்திரியில் வைக்கப்பட்டு இருந்தது அப்போது அவரது உடலில் பல்வேறு இடங்களில் பலத்த காயங்கள் இருந்தன. இதனால் அவரது இறப்பில் எங்களுக்கு சந்தேகம் உள்ளது. எனவே எனது சகோதரர் இறந்த வழக்கை வேறு விசாரணை அமைப்புக்கு மாற்ற வேண்டும். அவரது இறப்புக்கு 50 லட்சம் ரூபாய் இழப்பீடாக வழங்க வேண்டும். என் சகோதரர் இறப்புக்கு காரணமான போலீஸ்காரர்கள் மீது துறை ரீதியான நடவடிக்கை எடுக்க உத்தரவிட வேண்டும் என மனுவில் கூறியிருந்தார்.
இந்த வழக்கு நீதிபதி தனபால் முன்பு விசாரணைக்கு வந்தது.அப்போது அரசு வக்கீல் ஆஜராகி ஏற்கனவே இந்த வழக்கு சிபிசிஐடி விசாரணைக்கு மாற்றப்பட்டது. வெங்கடேசனின் தாயாரிடம் 5 லட்சம் ரூபாயை இழப்பீடாக முதற்கட்டமாக ராமநாதபுரம் மாவட்ட கலெக்டர் வழங்கியுள்ளார். மேலும் உரிய நடவடிக்கை எடுக்கப்பட்டு உள்ளது. எனவே இந்த வழக்கை தள்ளுபடி செய்ய வேண்டும் என்று தெரிவித்தார். இதை பதிவு செய்து கொண்ட நீதிபதி, இந்த வழக்கில் சகோதரனின் மரணத்திற்கு இழப்பீடு கேட்டும் சம்பந்தப்பட்ட காவல்துறை மீது துறை ரீதியான நடவடிக்கை எடுக்க கோரியும் இந்த வழக்கை சிபிசிஐடி விசாரணைக்கு மாற்றக் கோரி மனு தாக்கல் செய்யப்பட்டுள்ளது இந்த வழக்கை பொறுத்தவரை சம்பந்தப்பட்ட காவலர்கள் மீது இராமநாதபுரம் மாவட்ட காவல்துறை கண்காணிப்பாளர் துறை ரீதியான நடவடிக்கை ஏற்கனவே எடுத்து உள்ளார். மேலும் வளர்க்கும் சிபிசிஐடி விசாரணைக்கு மாற்றப்பட்டுள்ளது.
எனவே காவல் நிலையத்தில் காவலர்களால் தாக்கப்பட்டு இறந்து போன நபரின் குடும்பத்திற்கு இழப்பீடு தொகையாக 30 லட்சம் ரூபாய் இழப்பீட்டை அரசு இரண்டு மாதத்தில் வழங்க வேண்டும். அந்த தொகையில் ஏற்கனவே கொடுத்த ரூ.5 லட்சத்தை கழித்துக் கொள்ளலாம் என்று நீதிபதி உத்தரவிட்டு வழக்கை முடித்து வைத்தார்.
