மாணவர்களுக்கு கொரியரில் போதைப்பொருள் சப்ளை.. ஸ்பாட்டிற்கு சென்று கிடுக்கு பிடியாக பிடித்த போலீஸ்

கடந்த சில மாதங்களுக்கு முன், கோவை பீளமேடு பகுதியில் கல்லூரி மாணவர்கள் தங்கியிருந்த அறையில் இருந்து கஞ்சா மற்றும் எல்.எஸ்.டி. வகை போதைப் பொருட்களை போலீசார் பறிமுதல் செய்தனர். அங்கிருந்த மாணவர்களிடம் போலீசார் விசாரித்தபோது, அந்த போதைப்பொருட்களை மேகாலயா மாநிலம், ஷில்லாங்கில் இருந்து அம்ருதீன் என்பவர் அனுப்பி வைத்ததாக தெரிவித்தனர். உடுமலைப்பேட்டையை சேர்ந்த பி.டெக் பட்டதாரி அம்ருதீன், மேகாலயா மாநிலம், சில்லாங்கில் பணிபுரிந்து வருகிறார். இவர், ஷில்லாங்கில் இருந்து போதை மாத்திரைகளை, கோவையில் உள்ள கல்லூரி மாணவர்களுக்கு கொரியர் மூலம் அனுப்பி வைத்துள்ளார். இதனையடுத்து தனிப்படை போலீசார், மேகாலயா மாநிலம் சில்லாங்கிற்குச் சென்று அவரை கைது செய்து, தமிழகத்திற்கு அழைத்து வந்தனர். அவரது அறையில் இருந்து, 1 கிலோ 25 கிராம் கஞ்சாவையும் போலீசார் பறிமுதல் செய்தனர்.