நரம்பு மண்டலத்தையே நொறுக்கும் போதைப்பொருள்..!சென்னையின் ஹாட்ஸ்பாட்டில் நடந்த டீலிங்..

சென்னை மடிப்பாக்கத்தில், கடந்த 11ஆம் தேதி போதைப்பொருட்களுடன் 4 பேரும், 19ஆம் தேதி போதைப்பொருள் டீலர்கள் சீனிவாசன் மற்றும் மகாதேவன் ஆகியோரும் கைது செய்யப்பட்டனர். இவர்களுக்கு சப்ளையராக யார் உள்ளனர் என்று தீவிர விசாரணை மேற்கொண்ட போலீசார், போதைபொருள் கடத்தல் மன்னனாக செயல்பட்டு வந்த திருவல்லிக்கேணியை சேர்ந்த ஓட்டல் அதிபர்கள் ஜெயினுலாப்தின், அவரது சகோதரர் முகமது ரமால் மற்றும் சேக் அப்துல்லா ஆகிய 3 பேரை கைது செய்தனர். அவர்களிடம் நடத்தப்பட்ட விசாரணையில், பல்வேறு தகவல்கள் அம்பலமாயின. ஆரம்பத்தில் எலக்ட்ரானிக் பொருட்களை கப்பல் மூலமாக கடத்தி வரும் குருவியாக செயல்பட்டு வந்த இவர்கள், பின்னர் 10 வருடங்களாக போதைப்பொருள் கடத்தலில் ஈடுபட்டுள்ளனர். மும்பை துறைமுகம் உள்ளிட்ட இடங்களில் இருந்து, கப்பல் மூலமாக சென்னை பாரீஸ்க்கு போதைப்பொருட்களை கடத்தி வந்து கைமாற்றி வந்துள்ளனர். மேலும், மெத் போதை பொருட்களை, சென்னையில் இருந்து, கப்பல் மூலமாகவே மலேசியா, தாய்லாந்து உள்ளிட்ட நாடுகளுக்கு கடத்தியதும் அம்பலமாகியுள்ளது. இதுவரை பத்துக்கும் மேற்பட்டமுறை, மெத் போதை பொருளை கடத்தி பெரும் லாபம் ஈட்டியிருப்பதாக வாக்குமூலத்தில் தெரிவித்துள்ளனர். போதைப்பொருளுடன் சிக்காமல் எப்படி தப்பிக்கின்றனர்... கடத்தல் மூலம் கிடைத்த பணத்தில் ஹோட்டல்கள் உள்ளிட்ட சொத்துக்களை வாங்கினார்களா? என்பது குறித்து போலீசார் விசாரணை மேற்கொண்டு வருகின்றனர்.