மனைவி வேலை செய்யும் கடைக்கு சென்று கொடூரமாக தாக்கிய கணவன்.. - வெளியான அதிர்ச்சி சிசிடிவி

சென்னை அத்திப்பட்டு சீனிவாசன் நகரைச் சேர்ந்த பாத்திமாவுக்கும், அப்துல்லாவுக்கும் திருமணம் ஆகி இரண்டு பெண் குழந்தைகள் உள்ளனர். அப்துல்லா தினமும் குடித்து விட்டு, பாத்திமாவை தாக்கி வந்ததாக கூறப்படுகிறது. இதனால், அப்துல்லாவை விட்டுப் பிரிந்த பாத்திமா, விவாகரத்து கேட்டு நீதிமன்றத்தில் வழக்கு தொடர்ந்து உள்ளார்.

இந்நிலையில், பாத்திமா பணிபுரிந்து வரும் தியாகராய நகர் ரங்கநாதன் தெருவில் உள்ள டெய்லர் கடைக்கு வந்த தனது சகோதரருடன் வந்த அப்துல்லா, அவரை ஆபாசமாக திட்டி, கொலை மிரட்டல் விடுத்து பேசியதாக கூறப்படுகிறது. பின்னர் வெளியே வந்த பாத்திமாவை அப்துல்லா காலணியால் கொடூரமாகத் தாக்கியுள்ளார். இதில் காயமடைந்த பாத்திமா மருத்துவமனையில் சிகிச்சை பெற்றுவிட்டு மாம்பலம் காவல் நிலையத்தில் புகார் அளித்துள்ளார். போலீசார் இரு தரப்பிடமும் விசாரணை மேற்கொண்டு வரும் நிலையில், மனைவி பாத்திமாவை அப்துல்லா தாக்கும் சிசிடிவி காட்சி வெளியாகி பரபரப்பை ஏற்படுத்தியுள்ளது.