5 மணி நேரம் விமானங்கள் நிறுத்தம்..! திருவனந்தபுரம் விமான நிலையம் அறிவிப்பு | Kerala

கேரளாவில், பத்மநாப சுவாமி கோயில் விழாவுக்காக இன்று, 5 மணி நேரம் விமானங்கள் இயக்கம் நிறுத்தப்படுவதாக அறிவிக்கப்பட்டுள்ளது.

திருவனந்தபுரம் சர்வதேச விமான நிலையம், புகழ்பெற்ற பத்மநாப சுவாமி கோவில் அருகே அமைந்துள்ளது. இக்கோயில் புனித நிகழ்வுக்காக, ஆண்டுக்கு 2 முறை விமான நிலையத்தின் ஓடுபாதை மூடப்படுகிறது. அந்த வகையில், பத்மநாப சுவாமி கோயிலில் இன்று 'ஐப்பசி ஆறாட்டு' விழா நடைபெறுகிறது. இதற்காக சாமி சிலைகளை சங்குமுகம் கடற்கரைக்கு ஊர்வலமாக எடுத்து சென்று அங்கு ஆறாட்டு நிகழ்ச்சி நடத்தப்படுகிறது. இந்த சாமி ஊர்வலம் திருவனந்தபுரம் விமான நிலையத்தில் உள்ள ஓடுபாதையை கடந்து கடற்கரைக்கு செல்லும். அதற்காக இன்று 5 மணி நேரம் விமான இயக்கம் நிறுத்தி வைக்கப்படுவதாக அறிவிக்கப்பட்டுள்ளது. மாலை 4 மணி முதல் இரவு 9 மணி வரை விமான இயக்க நிறுத்தம் அமலில் இருக்கும் என தெரிவிக்கப்பட்டுள்ளது.