சென்னையில் நடைபெற்ற "புஷ்பா 2" ப்ரமோஷன் நிகழ்ச்சி ...படத் தயாரிப்பாளரை நோக்கி பேசி பொங்கி எழுந்த தேவி ஸ்ரீ பிரசாத்

நடிகர் அல்லு அர்ஜூன், ராஷ்மிகா மந்தனா நடிப்பில் வெளியாகி சூப்பர் டூப்பர் ஹிட்டான திரைப்படம் புஷ்பா.

இத்திரைப்படத்தின் இரண்டாம் பாகம் வருகின்ற டிசம்பர் ஐந்தாம் தேதி ரிலீஸாக உள்ள நிலையில், படத்தின் ப்ரமோஷன் நிகழ்ச்சி சென்னையில் மிகப் பிரம்மாண்டமாக நடைபெற்றது...

முன்னதாக, புஷ்பா 2 படத்தின் இசையமைப்பாளரான தேவி ஸ்ரீ பிரசாத், படத்தின் பின்னணி இசைப் பொறுப்பில் இருந்து நீக்கப்பட்டதும், அவருக்கு பதிலாக தமன், சாம் சி.எஸ் மற்றும் அஜ்னிஷ் லோக்நாத் ஆகியோர் பணிபுரிந்து வருவதும் குறிப்பிடத்தக்கது...

இது தகவலாக வெளியானாலும், தேவி ஸ்ரீ பிரசாத்துடன் படக் குழுவுக்கு என்ன பிரச்சினை என்பது தெரியாமல் இருந்தது..

இந்நிலையில்தான், சென்னையில் நடைபெற்ற புஷ்பா 2’ படத்தின் ப்ரமோஷன் நிகழ்ச்சிக்கான மேடையில் ஏறினார் இசையமைப்பாளர் தேவி ஸ்ரீ பிரசாத்..

மேடையில் பேசும் போது, படத் தயாரிப்பாளர் ரவியைக் குறிப்பிட்டு பேசியதுதான் தற்போது சலசலப்பை ஏற்படுத்தி இருக்கிறது..

தயாரிப்பாளர்கள் கொடுக்கும் சம்பளமாக இருந்தாலும் சரி, ஒரு பணிக்கான பெயராக இருந்தாலும் சரி, அதை நாம்தான் கேட்டு பெற்றுக்கொள்ள வேண்டும் எனவும், நாம் கோரவில்லை என்றால் யாரும் நமக்குத் தகுதியான நன்மதிப்பைக் கொடுக்க மாட்டார்கள் எனவும் பேசியிருக்கிறார் தேவி ஸ்ரீ பிரசாத்.

ரவி சார்... நான் பாடலையோ, பின்னணி இசையையோ சரியான நேரத்தில் வழங்கவில்லை என்று என்னைக் குறை கூறுகிறீர்கள். நீங்கள் என்னை விரும்புகிறீர்கள் என்று எனக்குத் தெரியும். அன்பு இருக்கும் இடத்தில் புகார்களும் இருக்கத்தான் செய்யும். இருப்பினும், அன்பை விட என் மீது உங்களுக்கு அதிக புகார்கள் இருப்பது போல் தெரிகிறது என பேசியது பரபரப்பை ஏற்படுத்தியது..

மேலும், இந்த விழாவுக்கு நான் தாமதமாக வந்ததாக சொல்கிறீர்கள். நான் 25 நிமிடங்களுக்கு முன்பே இங்கு வந்து விட்டேன். ஆனால், நீங்கள் உள்ளே வருவதை படமாக்க வேண்டும் என்று கூறி என்னை காக்க வைத்துவிட்டார்கள். அது எனது தவறில்லை என மேடையில் பொங்கியிருக்கிறார் டி.எஸ்.பி

இந்தப் பேச்சின் மூலம் மைத்ரி மூவி மேக்கர்ஸ் மற்றும் தேவி ஸ்ரீ பிரசாத் இருவருக்கும் பிரச்சினைகள் இருப்பது தெளிவாகி இருக்கிறது.

இதனாலேயே மைத்ரி மூவீ மேக்கர்ஸ் தயாரிப்பில் தயாராகி வரும் நடிகர் அஜித்தின் குட் பேட் அக்லி படத்திலிருந்து தேவி ஸ்ரீ பிரசாத் நீக்கப்பட்டு இருப்பது உறுதியாகி இருப்பதாகவும் கூறப்படுகிறது.