'லவ் டுடே' பட பாணியில் தரமான சம்பவம்.. வருங்கால மனைவியிடம் சிக்கிய மாமாக்குட்டி.. தாலி கட்டும் கையில் கம்பி எண்ணும் பரிதாபம்

லவ் டுடே சினிமா பாணியில் செல்போனை மாற்றிக் கொண்டதில் ஓட்டுநரின் சுயரூபம் வெளிச்சத்திற்கு வந்து கைது செய்யப்பட்டதன் பின்னணியை விவரிக்கிறது இந்த தொகுப்பு...

காதலிக்கும் ஜோடிகள் செல்போனை மாற்றிக் கொண்டால் என்னவாகும் என்பதை மையமாக கொண்டு வெளியான படம் லவ் டுடே. இந்த படத்தை பார்த்து அதே பாணியை பின்பற்றிய ஓட்டுநர் ஒருவர் வசமாக போலீசில் சிக்கியிருக்கிறார்...

சேலம் மாவட்டம் வாழப்பாடியை அடுத்த பேளூரை சேர்ந்தவர் 23 வயதான அரவிந்த். தனியார் ஆம்புலன்ஸ் ஓட்டுநரான இவருக்கு சமீபத்தில் திருமணம் நிச்சயமானது...

இவருக்கு நிச்சயம் செய்யப்பட்ட பெண், லவ் டுடே பட பாணியில் அரவிந்தின் செல்போனை வாங்கி பார்த்துள்ளார். அப்போது அதில் 10 ஆம் வகுப்பு மாணவி ஒருவர் அரை நிர்வாண கோலத்தில் இருப்பதும், மற்றொரு முனையில் அதை அரவிந்த் பார்ப்பது போன்ற வீடியோ இருந்தது தெரியவந்தது.

இதை பார்த்து அதிர்ந்து போன அந்த பெண், இதுகுறித்த விசாரணையில் இறங்கினார். அப்போது 10 ஆம் வகுப்பு மாணவியை சமூக ஊடகத்தின் மூலம் அரவிந்த் தொடர்பு கொண்டு பழகி பின்னர் காதல் வலையில் வீழ்த்தியது தெரியவந்தது.

ஒரு கட்டத்தில் மாணவியிடம் அரை நிர்வாண கோலத்தில் வீடியோ கால் வருமாறு சொல்லவே மாணவியும் அதை அப்படியே செய்திருக்கிறார். ஆனால் இதை அரவிந்த் ரெக்கார்ட் செய்து கொண்டதும் தெரியவந்தது.

இதனால் கொதித்துப் போன நிச்சயம் செய்யப்பட்ட பெண் மாணவியின் பெற்றோருக்கு உடனே தகவல் தெரிவித்தார். உடனே அவர்கள் அரவிந்த் மீது போலீசில் புகார் கொடுக்க வாழப்பாடி போலீசார் அரவிந்தை போக்சோ சட்டத்தில் கைது செய்தனர்.

இதற்கு முன்பாக அரவிந்த் வேறு யாரிடமும் காதல் வலை வீசி இதுபோன்ற செயலில் ஈடுபட்டாரா? என்ற விசாரணையும் நடந்து வருகிறது.

படிக்கும் வயதில் காதல், சமூக வலைதளத்தில் அறிமுகமானவரை நம்பி இதுபோன்ற விபரீதங்களில் ஈடுபட வேண்டாம் என எச்சரிக்கிறார் வாழப்பாடி காவல் துணை கண்காணிப்பாளர் ஹரிசங்கரி..