நிழற்குடையை சேதப்படுத்திய அடையாளம் தெரியாத வாகனம் - மக்களின் பகிரங்க குற்றச்சாட்டு

ஈரோடு மாவட்டம் சத்தியமங்கலம் அருகே, அடையாளம் தெரியாத வாகனம் மோதியதில் நிழற்குடை கடுமையான சேதமடைந்தது. நிழற்குடை மீது மோதிய வாகனத்தின் முன்புற கண்ணாடி உடைந்தும், சிறிது கிராவல் மண்ணும் கொட்டிக் கிடந்துள்ளது. தகவலறிந்து வந்த போலீசார், சம்பவம் நடந்த இடத்தில் ஆய்வு செய்தனர். அப்பகுதியில் இரவு நேரத்தில் டிப்பர் லாரிகளில் கிராவல் மண் கடத்தப்படுவதாகவும், போலீசாரிடம் சிக்காமல் இருக்க லாரிகளை ஓட்டுநர்கள் வேகமாக இயக்குவதாகவும் மக்கள் புகார் தெரிவித்தனர். எனவே டிப்பர் லாரி மோதியதால்தான் நிழற்குடை சேதம் அடைந்துள்ளது என அப்பகுதி மக்கள் உறுதிபட தெரிவித்துள்ளனர். அதிகாலையில் நிழற்குடையில் யாரும் இல்லாததால் உயிர்ச்சேதம் தவிர்க்கப்பட்டது.