'ஸ்டார்ட் பண்ணாத சத்தம் வரும்' ஆட்டோவை திருடிய மர்ம நபர்கள் - வெளியாகிய சிசிடிவி வீடியோ

தேனி அருகே பெட்ரோல் பங்கில் நிறுத்தி வைக்கப்பட்டிருந்த ஆட்டோவை மர்மநபர்கள் திருடி செல்லும் சிசிடிவி வீடியோ வெளியாகி பரபரப்பை ஏற்படுத்தியுள்ளது.

தேனி மாவட்டம் ஆண்டிப்பட்டி மேலத்தெருவை சேர்ந்தவர் ராஜ்குமார். இவர் வாடகைக்கு ஆட்டோ எடுத்து ஓட்டி வரும் நிலையில், தினமும் இரவு பெட்ரோல் பங்க் அருகே ஆட்டோவை நிறுத்தி செல்வது வழக்கம் என கூறப்படுகிறது.

இந்த நிலையில், காலையில் பெட்ரோல் பங்க் வந்த ராஜ்குமார் ஆட்டோ காணாததை கண்டு அதிர்ச்சியடைந்தார். புகாரின் அடிப்படையில் சம்பவ இடத்திற்கு வந்த போலீசார், அருகில் உள்ள சிசிடிவியை கைப்பற்றி பார்த்த போது, இரவில் பெட்ரோல் பங்க் வந்த இருவர் ஆட்டோவை திருடி செல்வதை கண்டு அதிர்ச்சியடைந்தனர். இது தொடர்பான வீடியோ வெளியான நிலையில், மர்மநபர்களை போலீசார் தேடி வருகின்றனர்.