மனைவியை தகாத முறையில் பேசிய நபர் - கணவன் கொடுத்த அதிர்ச்சி வாக்குமூலம்

கரூர் மாவட்டம் குளித்தலை அருகே கிணற்றில் நபர் சடலமாக மீட்கப்பட்ட விவகாரத்தில், கொலையாளியை போலீசார் கைது செய்தனர். குளித்தலை அருகே சுக்காம்பட்டியை சேர்ந்தவர் செல்வம். இவர், கடந்த 7 ஆம் தேதி விவசாயக் கிணற்றில் பலத்த காயங்களுடன் சடலமாக மீட்கப்பட்ட சம்பவம் அதிர்ச்சியை ஏற்படுத்தியது. இது குறித்து தீவிர விசாரணை நடத்தி வந்த போலீசார், அதே ஊரை சேர்ந்த வெள்ளைச்சாமி என்பவரை கைது செய்து விசாரணை நடத்தினர். விசாரணையில், மனைவியை தகாத முறையில் பேசியதற்காக கொலை செய்தது தெரியவர, வெள்ளைச்சாமியை போலீசார் நீதிமன்றத்தில் ஆஜர்படுத்தி சிறையில் அடைத்தனர்.