காரில் டாக்டர் ஸ்டிக்கர் ஒட்டி டாக்டர் வீட்டிலேயே கொள்ளையடித்த இணைபிரியா சகோதரர்கள்.. விசாரணையில் மற்றொரு திடுக் தகவல்

வேலூர் மாவட்டம் பூந்தோட்டம் மற்றும் சத்துவாச்சேரி பகுதிகளில் உள்ள 2 மருத்துவர்கள் வீட்டில், கடந்த மாதம் கொள்ளை சம்பவம் நடைபெற்றது. இதில், 22 சவரன் தங்க நகை, 15 லட்சம் ரூபாய் பணம் உள்ளிட்டவை திருடு போனது. இதுதொடர்பாக தனிப்படை அமைத்து போலீசார் விசாரணை நடத்தி வந்தனர். இந்நிலையில், கொள்ளை சம்பவத்தில் தொடர்புடைய தர்மபுரி மாவட்டத்தைச் சேர்ந்த மொய்தீன் மற்றும் அவரது சகோதரர் ஷாஜகான் ஆகியோரை போலீசார் கைது செய்தனர். அவர்களிடம் இருந்து அமெரிக்க டாலர்கள் உட்பட 10 லட்சத்து 50 ஆயிரம் ரூபாய் பணம், இரண்டரை சவரன் தங்க நகை, ஒரு கார் மற்றும் 2 இருசக்கர வாகனங்களும் பறிமுதல் செய்யப்பட்டன. பின்னர் இருவரும் நீதிமன்றத்தில் ஆஜர்படுத்தப்பட்டு சிறையில் அடைக்கப்பட்டனர். கைதான சகோதரர்களிடம் நடத்தப்பட்ட விசாரணையில், அவரது தந்தையும் பல்வேறு திருட்டு சம்பவங்களில் தொடர்புடையவர் என்பதும், காரில் மருத்துவர் சின்னம் அடங்கிய ஸ்டிக்கரை ஒட்டி கொள்ளையில் ஈடுபட்டு வந்ததும் தெரியவந்தது.