ஸ்தம்பித்த திருப்பதி ஏழுமலையான் கோயில் - துடைப்பத்தை கையில் எடுத்த அதிகாரிகள்

திருப்பதியில் தூய்மை பணியாளர்கள் வேலை நிறுத்தத்தில் ஈடுபட்டுள்ளதால், தேவஸ்தான அதிகாரி உள்ளிட்டோர் சுத்தப்படுத்தும் பணியில் ஈடுபட்டனர்.

ஊதிய உயர்வு, தொகுப்பு ஊதியம் ஆகியவை உள்ளிட்ட கோரிக்கைகளை வலியுறுத்தி தூய்மை பணியாளர்கள் கடந்த சில நாட்களாக வேலை நிறுத்த போராட்டத்தில் ஈடுபட்டு வருகின்றனர். கோடை விடுமுறை துவங்கி பக்தர்கள் வருகை அதிகரித்துள்ள காரணத்தால் தேவையான அளவில் தூய்மை பணிகளை மேற்கொள்ள இயலாத நிலை ஏற்பட்டுள்ளது. எனவே தேவஸ்தான நிர்வாக அதிகாரி முதல் ஊழியர்கள் வரை பலரும் திருப்பதி மலையில் தூய்மை பணிகளை மேற்கொண்டனர். இதனிடையே அந்த நிறுவனத்திற்கு வழங்கப்பட்டிருந்த ஒப்பந்தத்தை தேவஸ்தான நிர்வாகம் அதிரடியாக ரத்து செய்தது. மேலும் வேறு சில நிறுவனங்கள் மூலம் தூய்மை பணிக்கு பணியாளர்களை தேர்வு செய்ய தேவையான ஏற்பாடுகளை போர்க்கால அடிப்படையில் தேவஸ்தான நிர்வாகம் செய்து வருகிறது.