திருடர்கள் என நினைத்து கோயிலுக்கு சென்றவர்களை தாக்கிய இளைஞர்கள் - உயிருக்கு ஆபத்தான நிலையில் 10 வயது சிறுமி - புதுக்கோட்டையில் அதிர்ச்சி

புதுக்கோட்டை அருகே திருடர்கள் என நினைத்து குடும்பத்துடன் கோயிலுக்கு சென்றவர்களை இளைஞர்கள் சிலர் தாக்கியதில், 10 வயது சிறுமி உயிருக்கு ஆபத்தான நிலையில் மருத்துவமனையில் அனுமதிக்கப்பட்ட சம்பவம் அதிர்ச்சியை ஏற்படுத்தியுள்ளது. புதுக்கோட்டை மாவட்டம் கீரனூர் பகுதிகளில் உள்ள கோவில்களில் சிலர் கொள்ளையடித்து விட்டு, ஆட்டோவில் தப்பி செல்வதாக அப்பகுதியை சேர்ந்த இளைஞர்களிடையே தகவல் பரவியுள்ளது. இதையடுத்து, இளைஞர்கள் சிலர், சினிமா பாணியில் இருசக்கர வாகனத்தில் ஆட்டோ ஓன்றை விரட்டி பிடித்து, அதில் பயணித்தவர்களை தாக்கியுள்ளனர். அப்போது, சாலையில் கண்காணிப்பு பணியில் இருந்த போலீசார் ஆட்டோவில் இருந்தவர்களை மீட்டுள்ளனர். இளைஞர்கள் தாக்கியதில் ஆட்டோவில் இருந்த 10 வயது சிறுமி தலையில் பலத்த காயமடைந்துள்ளார். தொடர்ந்து, ஆட்டோவில் இருந்தவர்களிடம் போலீசார் நடத்திய விசாரணையில், அவர்கள் விருத்தாச்சலத்தை சேர்ந்தவர்கள் என்பதும், குடும்பத்தோடு கோவில் கோயிலாக வழிபாடு நடத்தி வந்த‌து தெரியவந்த‌து. இதையடுத்து ஆட்டோவில் இருந்தவர்களை மீட்ட போலீசார், மருத்துவமனையில் அனுமதித்தனர். இளைஞர்கள் தாக்கியதில் படுகாயம் அடைந்த சிறுமி உயிருக்கு ஆபத்தான நிலையில், மருத்துவமனையில் சிகிச்சை பெற்று வருகிறார். இந்த சம்பவம் குறித்து வழக்குப்பதிவு செய்த போலீசார், தாக்குதல் நடத்திய இளைஞர்கள் குறித்து விசாரணை நடத்தி வருகின்றனர்.