"லைக்ஸ்-க்கு ஆசைப்பட்டு லைப்பை தொலைச்சிட்டியே.." நடுரோட்டில் குதூகல குளியல் போட்ட இளைஞர்... போலீசார் செய்த சிறப்பான சம்பவம்

ஈரோடு பன்னீர் செல்வம் பூங்கா சந்திப்பில், இருசக்கர வாகனத்தில் சென்ற இளைஞர், சிக்னலில் நின்று குளித்த சம்பவம் சமூக வலைதளங்களில் வேகமாக பரவியது.

சமூக வலைத்தளத்தில் லைக் பெறுவதற்காக அந்த இளைஞர் செய்த செயலால், வழக்கை சந்தித்துள்ளார். வெள்ளோட்டைச் சேர்ந்த பார்த்திபன் என்ற இளைஞர், இன்ஸ்டாகிராமில் வந்த 10 ரூபாய் பந்தயத்தை ஏற்று சிக்னலில் குளித்துள்ளார். தற்போது அவர் மீது 3 பிரிவுகளின் கீழ் போலீசார் வழக்குப்பதிவு செய்து, 3 ஆயிரத்து 500 ரூபாய் அபராதம் விதித்து நடவடிக்கை எடுத்துள்ளனர். ஏற்கெனவே இரவு நேரத்தில் நடு ரோட்டில் தூங்குவது, பச்சை மீன்கள் சாப்பிடுவது, இரவில் கிணற்றில் குளிப்பது உள்ளிட்ட பல்வேறு சவால்களை செய்துள்ளார். இவரைப் போன்று இளைஞர்கள் யாரும் இந்த விபரீத செயலில் ஈடுபட வேண்டாம் எனவும், அவ்வாறு செய்தால் அவர்கள் மீது கடும் நடவடிக்கை எடுக்கப்படும் என போலீசார் எச்சரிக்கை விடுத்தனர்.