கல்லூரி மாணவிக்கு கத்தி குத்து...ஒருதலை காதலால் நடந்த பயங்கரம்...

என்ன நடந்தது...? கொலை முயற்சிக்கு காரணம் என்ன..? கஞ்சா பாய்க்கும் கல்லூரி மாணவிக்கு என்ன தொடர்பு..? போலீசாரிடம் பிடிபட்ட அரக்கனின் பெயர் நவீன். 22 வயதான இவர் பரங்கிமலை கலைஞர் நகர் பகுதியை சேர்ந்தவர். கைசெலவுக்கு அவ்வப்போது கிடைக்கும் வேலைகளை செய்து வந்திருக்கிறார் நவீன். ஆனால் இவரின் முழு நேர வேலை போதையை போட்டு கொண்டு வலம் வருவது. அப்படி ஊரை சுற்றி வந்த வேலையில் தான் கடந்த 2 ஆண்டுகளுக்கு முன் பரங்கிமலை ஏழுகிணறு பூந்தோட்டம் பகுதியை சேர்ந்த அஷ்மிதா என்ற பெண்ணுடன் பழக்கம் ஏற்பட்டிருக்கிறது. தற்போது 18 வயதாகும் அஷ்மிதா கல்லூரியில் முதலாம் ஆண்டு படித்து வருகிறார்.

இரண்டு ஆண்டுகளாக இருவரும் நண்பர்களாக பழகி வந்திருக்கிறார்கள். அந்த பழக்கம் நாளடைவில் நவீனின் மனதில் காதலாக மாறி இருக்கிறது. நீண்ட நாட்கள் ஒரு தலையாகவே காதலித்து வந்த நவீன், ஒரு நாள் அஷ்மிதாவிடம் தனது காதலை வெளிப்படுத்தி இருக்கிறார். ஆனால் நவீனின் அந்த ப்ரோபோசலை அஷ்மிதா ஏற்றுக்கொள்ளவில்லை. "நண்பனை காதலனாக என்னால் நினைத்து பார்க்க முடியாது" எனக்கூறி நவீனை விட்டு விலகி சென்றிருக்கிறார். அதன் பிறகு தான் நவீனின் சுயரூபம் அஷ்மிதாவுக்கு தெரியவந்திருக்கிறது.அன்று முதல் போதையை போட்டுக்கொண்டு தன்னை காதலிக்கும் படி அஷ்மிதாவுக்கு லவ் டார்ச்சர் கொடுத்து வந்திருக்கிறார் நவீன். இந்த அருவருப்பான செயலால் மனம் உடைந்து போனவர், நவீனை அறவே வெறுத்து ஒதுக்கி இருக்கிறார்.

இந்நிலையில் தான் சம்பவம் நடந்த அன்று இரண்டில் ஒன்று பார்க்க நினைத்த நவீன் முழு கஞ்சா போதையில் கத்தியோடு களத்தில் இறங்கி இருக்கிறார். கல்லூரி முடித்து வீட்டிற்கு திரும்பிய அஷ்மிதாவை வழிமறித்து தன்னை காதலிக்கும் படி வற்புறுத்தி இருக்கிறார்.ஆனால் அஷ்மிதா அதற்கு ஒப்புக்கொள்ளவில்லை.. இதனால் கொதித்துபோனவர் மறைத்து வைத்திருந்த கத்தியை அஷ்மிதாவின் கழுத்தில் இறக்கி விட்டு தப்பி ஓடி இருக்கிறார். ரத்த வெள்ளத்தில் சரிந்து விழுந்த அஷ்மிதாவை மீட்ட அக்கம்பக்கத்தினர், சிகிச்சைக்காக மருத்துவமனைக்கு அனுப்பி வைத்துவிட்டு போலீசாருக்கு தகவல் கொடுத்திருக்கிறார்கள்.உடனே சம்பவ இடத்திற்கு விரைந்த போலீசார், அங்கிருந்த சிசிடிவி காட்சிகளை சோதனை செய்து சினிமா பாணியில் நவீனை விரட்டி இருக்கிறார்கள்.3 கிலோமீட்டர் தூரம் நடந்த அந்த சேசிங்கில், நவீனை ஒரு கட்டி முடிக்கப்படாத கட்டிடத்தில் சுற்றி வலைத்து பிடித்திருக்கிறார்கள். கத்திகுத்து பட்ட அஷ்மிதா மருத்துவமனையில் சிகிச்சை பெற்று வரும் நிலையில், இந்த சம்பவம் தொடர்பாக வழக்கு பதிவு செய்த போலீசார், நவீனை கைது செய்து விசாரனை நடத்தி வருகின்றனர்.