வங்கி காசாளர் வீட்டில் கொள்ளை.. சினிமா பாணியில் மடக்கி பிடித்த போலீசார்- பரபரப்பு சிசிடிவி காட்சி

கடலூர் மாவட்டம் பண்ருட்டி அருகே, வங்கி காசாளர் வீட்டில் 18 சவரன் நகை, கார் திருடப்பட்ட வழக்கில், இருவர் கைது செய்யப்பட்டனர்.

ஒறையூர் கிராமத்தை சேர்ந்த சசிக்குமார் என்பவரது வீட்டின் பூட்டை உடைத்த இளைஞர்கள், 18 சவரன் நகை, ஒரு லட்சம் ரூபாய் பணம் மற்றும் வாசலில் நிறுத்தி வைத்திருந்த கார் ஆகியவற்றை கடத்திச் சென்றனர். இது தொடர்பான புகாரின் பேரில், தனிப்படை அமைத்து புதுப்பேட்டை போலீசார் விசாரணை நடத்தினர். திருட்டு நடந்த பகுதியில் பதிவான செல்போன் எண்களை வைத்து விசாரணை நடத்தியதில், திருடப்பட்ட கார் உளுந்தூர்பேட்டை டோல்கேட் வழியாக திருவண்ணாமலை நோக்கி செல்வதாக போலீசாருக்கு தகவல் கிடைத்தது. பின்னர், திருவண்ணாமலைக்கு விரைந்த போலீசார், திருடு போன காரை மீட்டனர். மேலும், காரை கடத்தியது குறித்து இளைஞர்கள் இருவரிடம் விசாரணை நடத்தியதில், சென்னையை சேர்ந்த பாலாஜி, யுவராஜ் என்பது தெரியவந்தது. இருவரையும் கைது செய்த போலீசார், விசாரணை நடத்தி வருகின்றனர்.