உயிருக்கு போராடிய பெண்..மருத்துவமனைக்கு செல்லும் வழியில் ஒரு குடும்பமே பலி

உத்தரபிரதேச மாநிலத்தில் அதிவேகமாக சென்ற கார் கால்வாயில் கவிழ்ந்து விபத்துக்குள்ளானதில், ஒரே குடும்பத்தைச் சேர்ந்த 4 பேர் உட்பட 5 பேர் பரிதாபமாக உயிரிழந்தனர்..கஸ்கஞ்ச் மாவட்டத்தின் காவல் நிலைய எல்லைக்குட்பட்ட அந்துவா கிராமத்தில் ஒரு பெண்ணின் உடல்நிலை திடீரென மோசமடைந்ததாக கூறப்படுகிறது. இதனையடுத்து, குடும்ப உறுப்பினர்கள் அந்த பெண்ணை எட்டாவில் உள்ள மருத்துவமனைக்கு காரில் அழைத்து சென்றனர்.

மார்தரா பகுதி அருகே கார் சென்ற போது, கட்டுப்பாட்டை இழந்து, அங்கிருந்த கால்வாயில் விழுந்து விபத்துக்குள்ளானது. இதில் காரில் பயணம் செய்த ஒரே குடும்பத்தைச் சேர்ந்த 4 பேர் உட்பட 5 பேர் உயிரிழந்துள்ளனர். தகவலின் பேரில் அங்கு வந்த போலீசார், சடலங்களை கைப்பற்றி விசாரணை மேற்கொண்டு வருகின்றனர்....