ஒரே இரவில் 4 இடங்களில் வழிப்பறி..சிறுவன் உட்பட 4 பேர் கொண்ட கும்பல் கைது

ஒரே இரவில் 4 இடங்களில் வழிப்பறி..சிறுவன் உட்பட 4 பேர் கொண்ட கும்பல் கைது

சிவகங்கை மாவட்டம் மானாமதுரை அருகே, ஒரே இரவில் 4 இடங்களில் வழிப்பறியில் ஈடுபட்ட சிறுவன் உட்பட 4 பேர் கொண்ட கும்பலை போலீசார் கைது செய்தனர்.

மானாமதுரை அருகே உள்ள கால்பிரவு கிராமத்தைச் சேர்ந்த துரைப்பாண்டி என்பவர், நேற்றிரவு மானாமதுரை பைபாஸ் சாலையில் சென்று கொண்டிருந்தபோது, 2 பேர் வழிமறித்துள்ளனர்.

அப்போது கையில் இருந்த ஆயுதங்களால், துரைப்பாண்டியை தாக்கிவிட்டு, இருசக்கர வாகனத்தை அந்தக் கும்பல் பறித்துச் சென்றது.

இதேபோல், முருகேசன், பிரபு ஆகிய இருவரிடமும், இதே வியூகத்தைப் பயன்படுத்தி, செல்போன் மற்றும் பணத்தை அந்தக் கும்பல் கையாடல் செய்துள்ளது.

இதுதொடர்பாக, பாதிக்கப்பட்ட 3 பேரும் காவல்நிலையத்தில் தனித்தனியாக அளித்த புகாரின் பேரில், சம்பந்தப்பட்ட இடத்தில் சிசிடிவி காட்சிகளை போலீசார் ஆய்வு செய்தனர்.

அதில், அந்தக் கும்பல் பயங்கர ஆயுதங்களுடன் சாலையில் சுற்றித் திரிந்தது அதிர்ச்சியை ஏற்படுத்தியது.

இந்த சம்பவம் தொடர்பாக, மானாமதுரை பகுதியை சேர்ந்த பரத்குமார், சந்தோஷ் குமார், நிதிஸ்வரன் மற்றும் சிறுவன் உட்பட 4 பேரையும் போலீசார் கைது செய்தனர்.

அவர்களிடம் இருந்து 4 செல்போன்கள், 4 ஆயிரம் ரூபாய் ரொக்கத்தையும் பறிமுதல் செய்தனர்.