19 நிமிடத்தில் 43 செய்திகள்... மாலை தந்தி செய்திகள்

ஊழலுக்கு எதிராக போராடுவதால் தன்னை காங்கிரஸ் வெறுக்கிறது எனக் கூறியிருக்கும் பிரதமர் மோடி, காங்கிரஸ் கர்நாடகா வளர்ச்சியை தடுக்கிறது என குற்றம் சாட்டியுள்ளார். கர்நாடக மாநிலம் கோலாரில் பிரசாரம் செய்த பிரதமர் மோடி, மல்லிகார்ஜுன கார்கே தன்னை விஷநாகத்துடன் ஒப்பிட்டதற்கு பதிலளித்தார். நாகம்தான் சிவனின் கழுத்தை அலங்கரிக்கும் ஆபரணம் என்றும், தன்னை பொறுத்தவரையில் நாட்டு மக்களே சிவனைப் போன்றவர்கள் எனவும் குறிப்பிட்டார்.

கள்ளழகர் வைகை ஆற்றில் எழுந்தருளும் நிகழ்ச்சிக்காக முன்னேற்பாடுகள் தீவிரப்படுத்தப்பட்டுள்ளன. மதுரை கள்ளழகர் கோயில் சித்திரைத்திருவிழா இன்று துவங்கி 10 நாட்கள் நடைபெறும். விழாவின் முக்கிய நிகழ்வான கள்ளழகர் எழுந்தருளல் நிகழ்ச்சி, வரும் 5ம் தேதி நடைபெற உள்ள நிலையில், அதற்காக ஆழ்வார்புரம் பகுதிகளில் சீரமைப்பு பணிகள் நடைபெற்று வருகின்றன.

அழகர்கோயில் ஆலயத்தில் இருந்து தங்ககுதிரை வாகனம் மதுரைக்கு அனுப்பி வைக்கப்பட்டது. வைகையாற்றில் கள்ளழகர் எழுந்தருளும் வைபவத்திற்காக வரும் 3-ஆம் தேதி, அழகர்கோயிலில் இருந்து கள்ளழகர் தங்கப்பல்லக்கில் மதுரை நோக்கி புறப்படுகிறார். இதற்காக அழகர்கோயில் ஆலயத்தில் இருந்து தங்ககுதிரை வாகனம், சேஷ வாகனம், கருட வாகனம் ஆகியவை மதுரைக்கு வாகனங்களில் ஏற்றப்பட்டு அனுப்பி வைக்கப்பட்டன.