(16.07.2023) ஊர்ப்பக்கம் | Oorpakkam | தமிழக செய்திகள் | Thanthi TV

நாமக்கல் மாவட்டம் பட்டணத்தில் கூலித்தொழிலாளி மர்மமான முறையில் உயிரிழந்த நிலையில் போலீசார் அதுகுறித்து விசாரணை நடத்தி வருகின்றனர். மதுப்பழக்கத்திற்கு அடிமையான சிவகுமார் என்பவர் மனைவியுடன் ஏற்பட்ட கருத்து வேறுபாடு காரணமாக தனது தாயுடன் வசித்து வந்ததாக கூறப்படுகிறது. நேற்று வெகுநேரமாகியும் சிவகுமார் வீடு திரும்பாத நிலையில், கோயில் ஒன்றின் அருகில் மர்மமான முறையில் இறந்துகிடந்துள்ளார்.

விருதுநகரில், தனியார் மதுபான கூடத்தில் சட்டவிரோதமாக கள்ளச்சந்தையில் விற்பனை செய்வதற்காக பதுக்கி வைக்கப்பட்டிருந்த சுமார் ஒன்றரை லட்சம் மதிப்பிலான 868 மது பாட்டில்களை போலீசார் பறிமுதல் செய்தனர். பழைய பேருந்து நிலையம் அருகே செயல்பட்டு வரும் தனியார் பாரில், அதிகாலை முதலே அதிக விலைக்கு அரசு மதுபாட்டில்கள் விற்கப்படுவதாக கூறப்படுகிறது. தகவலின்பேரில் சோதனை நடத்திய போலீசார், பதுக்கி வைக்கப்பட்டிருந்த மதுபாட்டிலக்ளை பறிமுதல் செய்து ஒருவரை கைது செய்தனர்.

ஈரோடு மாவட்டம் கோனேரிப்பட்டியில், தனியார் ஆம்புலன்ஸ் வாகனமும், சரக்கு வாகனமும் நேருக்கு நேர் மோதிய விபத்தில் இருவர் காயங்களுடன் மீட்கப்பட்டனர். விபத்தில் ஆம்புலன்ஸ் ஓட்டுநருக்கு கால் முறிவு ஏற்பட்டு மருத்துவமனையில் அனுமதிக்கப்பட்டுள்ளார். விபத்து காரணமாக தொப்பூர் தேசிய நெடுஞ்சாலையில் சிறிது நேரம் போக்குவரத்து பாதிக்கப்பட்டது.