மனைவி, குழந்தைகளுக்கு விஷம் கொடுத்து கணவனும் உயிரிழந்த சம்பவம் - அதிமுக ஊராட்சி மன்ற தலைவர் கைது

சிதம்பரம் புறவழிச்சாலையில் உரக்கடை வைத்திருந்தவர் கணேஷ். இவர் கடந்த 24ம் தேதி தனது மனைவி, மகன் மற்றும் மகளுக்கு விஷம் கொடுத்துவிட்டு தானும் தூக்கிட்டு உயிரிழந்தார்.

விஷம் கொடுக்கப்பட்ட 3 பேரும் தீவிர சிகிச்சையில் இருந்த நிலையில் மகள் சுமித்ரா சமீபத்தில் உயிரிழந்தார்.

கணேஷ் இறப்பதற்கு முன் பதிவு செய்த ஆடியோவில் "தன்னிடம் கடனுக்கு உரங்களை வாங்கிவிட்டு, திருப்பி தராதவர்களே என் முடிவுக்கு காரணம்" என குறிப்பிட்டிருந்தார்.

அதன்படி 8 பேர் மீது புதுச்சத்திரம் போலீசார் வழக்கு பதிந்திருந்த நிலையில் நேற்று திருவண்ணாமலையை சேர்ந்த புகழ்நேசன் என்பவரை கைது செய்தது.

ஏற்கனவே இந்த வழக்கில் முதல் குற்றவாளியான அதிமுக ஊராட்சி மன்ற தலைவர் செங்குட்டுவன் கைது செய்யப்பட்டுள்ளது குறிப்பிடத்தக்கது.