தமிழகத்தையே பரபரப்பாக்கிய கொடூர கொலைகள்... ஒரு வழியாக சிக்கிய அக்னி பிரதர்ஸ்

சிவகங்கையைச் சேர்ந்த அக்னிராஜ் என்பவர் கடந்த 2021-ஆம் ஆண்டு மைனர் மணி என்பவர் கொலை வழக்கில் குற்றவாளியாக சேர்க்கப்பட்டார். அதன்பின்னர், ஜாமினில் வந்த அக்னிராஜை மைனர் மணியின் ஆதரவாளர்கள் வெட்டி படுகொலை செய்தனர். இதற்கு பழிதீர்க்கும் விதமாக அக்னிராஜின் நண்பர்கள் ஒன்றிணைந்து அக்னி பிரதர்ஸ் என்ற குழுவை உருவாக்கி, இந்த கொலை வழக்கில் சம்பந்தப்பட்ட பரமசிவம், ஆகாஷ், அழகு பாண்டி ஆகியோரை படுகொலை செய்தனர். இதன் தொடர்ச்சியாக, கடந்த வியாழக்கிழமை வினோத் கண்ணன் என்பவரையும் இந்தக் கும்பல் படுகொலை செய்தது. இந்நிலையில், இக்கும்பலைச் சேர்ந்தவர்கள் ராயர்பாளையம் அருகே பதுங்கியிருப்பதாக போலீசாருக்கு தகவல் கிடைத்தது. அதன்பேரில், நித்திஷ்குமார், காளீஸ்வரன், பிரபுதேவா மற்றும் சாமிநாதன் ஆகியோரை போலீசார் கைது செய்தனர். மேலும், தலைமறைவாக உள்ள மூவரை காவல் துறையினர் தீவிரமாக தேடி வருகின்றனர்.