போலீசில் சிக்கியதும் தப்பிக்க திட்டம் போட்ட பிரபல ரவுடி.. எசகுபிசகு ஆன எஸ்கேப் பிளான்

கடலூரில், போலீசாரை கண்டு தப்பியோட முயன்ற பிரபல ரவுடி, பாலத்தில் இருந்து கீழே விழுந்து கை, கால்களை முறித்துக் கொண்டார்.

புதுச்சேரியை சேர்ந்தவர் தாடி அய்யனார். பிரபல ரவுடியான இவர், கடலூர், விழுப்புரம் உள்ளிட்ட மாவட்டங்களில் கொலை, கொள்ளை மற்றும் வெடி குண்டு சம்பவங்களில் ஈடுபட்டு தலைமறைவாக இருந்ததாக கூறப்படுகிறது. இந்நிலையில், கடலூர் மாவட்டம் ரெட்டிசாவடி என்ற பகுதியில் வைத்து அய்யனாரை போலீசார் சுற்றி வளைத்தனர். போலீசை பார்த்தவுடன் தப்பி ஓட முயன்ற அய்யனார், பாலத்தில் இருந்து கீழே குதித்ததில் அவரின் கை, கால் முறிந்ததாக கூறப்படுகிறது. இந்த சூழலில், அய்யனாரை கைது செய்திருக்கும் போலீசார், அவரை சிகிச்சைக்காக மருத்துவமனையில் அனுமதித்திருக்கின்றனர். தொடர்ந்து, அவரிடம் இருந்து ஒரு கிலோ கஞ்சாவை போலீசார் பறிமுதல் செய்த நிலையில், மருத்துவமனை சிகிச்சையில் இருக்கும் அய்யனாரை நீதிமன்ற காவலில் 15 நாள் அடைக்க நீதிபதி உத்தரவிட்டிருக்கிறார்.