கும்பகோணம் சமுதாயக் கூடத்தில் பயங்கர தீ விபத்து : அரசின் இலவச மிக்சி, கிரைண்டர்கள் சேதம்

கும்பகோணம் அருகே சுவாமி மலையில் ஏற்பட்ட தீ விபத்தில், அரசின் இலவச மிக்சி, கிரைண்டர்கள் எரிந்து சேதமடைந்தன. அங்குள்ள சமுதாயக் கூடம் ஒன்றில், நள்ளிரவில் திடீரென தீ விபத்து ஏற்பட்டு, கரும்புகை வெளியேறி உள்ளது. இதனைக் கண்ட அப்பகுதி மக்கள், உடனே தீயணைப்பு துறைக்கு தகவல் தெரிவித்தனர். விரைந்து வந்த தீயணைப்பு துறையினர், தீயை கட்டுக்குள் கொண்டு வந்தனர். இந்த தீ விபத்தில், பாபநாசம் பகுதி மக்களுக்கு வழங்குவதற்காக வைக்கப்பட்டிருந்த 2 ஆயிரம் மின் விசிறிகள், 500 மிக்சிகள், 500 கிரைண்டர்கள் ஆகியவை முற்றிலும் எரிந்து சேதமானது.  இந்த தீ விபத்து எப்படி ஏற்பட்டது? யாராவது தீ வைத்துச் சென்றார்களா? என்பது குறித்து போலீசார் தீவிர விசாரணை நடத்தி வருகின்றனர்.