"முன்னறிவிப்பு இன்றி ஆலையை மூட உத்தரவிடப்பட்டது" - உயர்நீதிமன்றத்தில் ஸ்டெர்லைட் தரப்பில் குற்றச்சாட்டு

ஸ்டெர்லைட் ஆலையை திறக்க கோரி வேதாந்தா நிறுவனம் தொடர்ந்த வழக்கு, நீதிபதிகள் சிவஞானம் மற்றும் பவானி சுப்பராயன் அடங்கிய அமர்வு முன்,  ஆறாவது நாளாக விசாரணைக்கு வந்தது. அப்போது, ஸ்டெர்லைட் தரப்பில் ஆஜரான மூத்த வழக்கறிஞர் மாசிலாமணி,  ஸ்டெர்லைட் ஆலை மாசுக்கட்டுப்பாட்டு வாரியத்தின் விதிகளை முறையாக பின்பற்றி வந்த நிலையில், எந்தவித முன் அறிவிப்பும் இல்லாமல் ஆலை மூடப்பட்டது என்று தெரிவித்தார். முறையாக அனுமதி பெற்று இயங்கும் தொழிற்சாலைகளால் கூட சுற்றுச்சூழல் பாதிப்பு ஏற்படுவதாக சுட்டிக்காட்டிய அவர், ஸ்டெர்லைட் ஆலையால் மிக குறைவான பாதிப்பே ஏற்பட்டுள்ளதாக வாதிட்டார். அப்போது குறுக்கிட்ட நீதிபதிகள், ஸ்டெர்லைட் ஆலைக்கு தீயணைப்பு மற்றும் சுற்றுச்சுழல் துறையின் அனுமதி உள்ளதா என கேள்வி எழுப்பினர்.

அனுமதி உள்ள போதும் அதை கருத்தில் கொள்ளாமல் ஆலையை அரசு மூடியுள்ளதாக ஸ்டெர்லைட் நிர்வாகம் தரப்பில் தெரிவிக்கப்பட்டது.  இதையடுத்து அடுத்த வாரம் 3 நாட்கள்  வாதங்களை வைக்க அரசு தரப்பு கோரிக்கையை  ஏற்றுக் கொண்ட நீதிபதிகள், வழக்கு விசாரணையை தள்ளி வைத்தனர்.