வடமாநில இளம் பெண்ணுக்கு பாலியல் தொல்லை - 4 இளைஞர்களிடம் போலீஸ் விசாரணை...

வங்கி ஒன்றில் பயிற்சிக்காக டெல்லியை சேர்ந்த 24 வயது இளம் பெண் ஒருவர் ரயில் மூலம் கும்பகோணத்துக்கு செவ்வாய் கிழமை இரவு வந்துள்ளார். அங்கிருந்து  குறிப்பிட்ட ஒரு ஹோட்டலுக்கு செல்வதற்காக  ஆட்டோவில் ஏறிய இந்தி மட்டுமே தெரிந்த, அந்த இளம் பெண்ணை ஆட்டோக்காரர் திசைமாறி அழைத்து  சென்றுள்ளார்.  சுதாரித்துக் கொண்ட அவர் கூச்சலிட்ட படியே ஆட்டோவில் இருந்து குதித்துள்ளார். காரைக்கால்  புறவழிச்சாலைக்கு ஓடிவந்த இளம்பெண் அங்கிருந்த  2 பேரிடம் உதவி கேட்க, அவர்கள் அந்த இளம் பெண்ணுக்கு பாலியல் துன்புறுத்தல் தந்துள்ளனர். ஒருகட்டத்தில் பயந்து போய் ஆட்டோவில் குறிப்பிட்ட ஓட்டலுக்கு அனுப்பி வைத்துள்ளனர். இதனைத் தொடர்ந்து அந்த பெண் தனது தந்தைக்கு தகவல் கொடுத்துள்ளார். அவரது தந்தை அளித்த புகாரில் இந்த இளம் பெண்ணை மீட்டு பாதுகாப்பு அளித்த போலீசார், மண்டபம் பகுதியை சேர்ந்த 4 பேரை  பிடித்து ரகசிய இடத்தில் வைத்து விசாரித்து வருகின்றனர். இதனிடையே  கும்பகோணம் நீதித்துறை நடுவர் நீதிமன்ற நீதிபதியிடம் அந்த இளம் பெண் ரகசிய வாக்குமூலம் அளித்துள்ளார்.  சம்பவ இடத்தில் மாவட்ட எஸ்.பி.செந்தில்குமார் நேரில் விசாரணை நடத்தி உள்ளார். இந்த நிலையில் வசந்த், தினேஷ் ஆகியோர் மீது கடத்தல், கொலை மிரட்டல்,  பலாத்காரம் உள்ளிட்ட பிரிவுகளில் வழக்குப்பதிவு செய்த போலீசார், அவர்களை கும்பகோணம் நீதித்துறை நடுவர் நீதிமன்ற நீதிபதி வீட்டில் ஆஜர்படுத்தினர். அவர்க​ளை 19ஆம் தேதி வரை நீதிமன்ற காவலில் வைக்க நீதிபதி உத்தரவிட்டதை அடுத்து, பலத்த போலீஸ் பாதுகாப்புடன் திருச்சி சிறைக்கு கொண்டு சென்றனர். இதனிடையே, மேலும் இருவர் இன்று நீதிமன்றத்தில் ஆஜர்படுத்தப்படலாம் என எதிர்பார்க்கப்படுகிறது.