தொடர் இருசக்கர வாகன திருட்டு - மூன்று பேர் கைது - 10 பைக்குகள் பறிமுதல் | Pondicherry

புதுச்சேரி மற்றும் தமிழக பகுதிகளில் தொடர் இருசக்கர வாகன திருட்டில் ஈடுபட்டு வந்த 3 பேரை போலீசார் கைது செய்தனர்.

கள்ளக்குறிச்சி மாவட்டம் சின்னசேலம் பகுதியை சேர்ந்த வேல்முருகன் என்பவர், புதுச்சேரிக்கு பணி நிமிர்த்தமாக வந்தபோது, ராஜீவ்காந்தி சதுக்கம் அருகே நிறுத்தி இருந்த இருசக்கர வாகனம் மாயமானது. இதுதொடர்பான புகாரின் பேரில், போலீசார் வழக்குப் பதிவு செய்து விசாரணை மேற்கொண்டனர். இந்த நிலையில், போலீசார் கோரி மேட்டு பகுதியில் ரோந்து சென்றபோது, 2 இளைஞர்கள் இருசக்கர வாகனத்தை தள்ளிக் கொண்டு சென்றனர். அவர்களை பிடித்து போலீசார் விசாரணை நடத்தியபோது, முன்னுக்குப் பின் முரணாக பதில் வந்தது. சந்தேகம் அடைந்த போலீசார், இருவரையும் கைது செய்து விசாரணை நடத்தியதில், கைதான இருவரும் சீர்காழியை சேர்ந்த திலீப் குமார் மற்றும் அனீஸ்குமார் என தெரியவந்தது.

புதுச்சேரியில் திலீப் உணவு டெலிவரி செய்யும் பணியையும், அனீஸ் ஜிப்மர் மருத்துவமனையில் ஒப்பந்த காவலாளியாக பணியாற்றி வருவதாக உறுதி செய்யப்பட்டது. தொடர் இருசக்கர வாகன திருட்டில் ஈடுபட்டு வந்த நிலையில், இந்த இருவருக்கும் உடந்தையாக இருந்த ராஜேஷ் என்பவரையும் கைது செய்த போலீசார், அவர்களிடம் இருந்து 10 இருசக்கர வாகனங்களையும் பறிமுதல் செய்தனர்.