முள்ளிவாய்க்கால் இனப்படுகொலை - 12ம் ஆண்டு நினைவேந்தல் நிகழ்வு

இலங்கை மட்டகளப்பு பகுதியில் முள்ளிவாய்க்கால் நினைவேந்தல் கூட்டம் நடத்த முயன்ற 10 பேரை போலீசார் கைது செய்தனர். கைது செய்யப்பட்டவர்கள் மீது பயங்கரவாத தடுப்பு சட்டத்தின் கீழ் நடவடிக்கை எடுக்கப்பட்டு உள்ளதாக காவல்துறை தெரிவித்துள்ளது. இதேபோல், யாழ்ப்பாணம் தேவாலயத்தில் உள்ள நினைவுத் தூணில் நினைவேந்தலை அனுசரிக்க முயன்ற முன்னாள் நாடாளுமன்ற உறுப்பினர் சரவணபவன் உள்ளிட்டோரை காவல்துறையினர் தடுத்து நிறுத்தினர்.

 

இலங்கை தமிழ் தேசிய கட்சியின் தலைவரும், முன்னாள் நாடாளுமன்ற உறுப்பினருமான சிவாஜிலிங்கத்தை போலீசார் கைது செய்ய முயன்றதால் பரபரப்பு ஏற்பட்டது. யாழ்ப்பாணத்தில் நடைபெற்ற முள்ளிவாய்க்கால் நினைவேந்தல் நிகழ்வில் பங்கேற்க முயன்ற அவரை தடுத்து நிறுத்திய போலீசார் விசாரணை மேற்கொண்டனர். மேலும் அவர் நினைவேந்தல் நிகழ்வில் பங்கேற்க அனுமதி மறுத்து திருப்பி அனுப்பினர்.

இலங்கையில் கொரோனா பரவலை கருத்தில் கொண்டு, பல இடங்களில் முள்ளிவாய்க்கல் நினைவேந்தலுக்கு தடை விதிக்கப்பட்டுள்ளது. இலங்கையில் நடைபெற்ற இறுதிப்போரில் உயிரிழந்த தமிழர்களின் நினைவாக, முள்ளிவாய்க்கால் நினைவேந்தல் அனுசரிக்கப்படுகிறது. இதன் 12ம் ஆண்டு நினைவு தினமான நேற்று கொரோனா கட்டுப்பாடுகளால் மக்கள் நடமாட்டத்திற்கு அனுமதி மறுக்கப்பட்டது. இதனால், முள்ளிவாய்க்கால் முற்றத்தில் நினைவேந்தல் நடத்த முடியாத நிலை ஏற்பட்டது. அதேவேளையில், இலங்கை போரின் வெற்றியை கொண்டாடும் நிகழ்வு, பத்தரமுல்ல பகுதியில் அதிபர் கோத்தபய ராஜபக்சே தலைமையில் இன்று நடைபெறவுள்ளது குறிப்பிடத்தக்கது.