யாரும் எதிர்பாராத சரவெடி சர்ப்ரைஸ் - விஜயின் இரட்டை குழல் துப்பாக்கி... ஒரே கல்லில் இரண்டு மாங்காய்

விஜயின் அரசியல் வருகை ஏறக்குறைய உறுதியாகிவிட்ட நிலையில், அடுத்தடுத்த இலவசங்களை வாரிக் கொடுத்துக் கொண்டிருக்கிறது நடிகர் விஜயின் மக்கள் இயக்கம்...விஜயின் அரசியல் பயணமாக இருந்தாலும், திரைப்பயணமாக இருந்தாலும் அவரது தொண்டர்களே இரட்டைகுழல் துப்பாக்கியாக இயங்கி காரியங்களை கண்ணும் கருத்துமாக முடிக்கின்றனர்... அந்த வகையில் சமீபத்தில் பல இலவசங்கள் அறிமுகமாகி அதகளப்படுத்தியுள்ளனர்...கடந்த சில மாதங்களுக்கு முன்பாகதான் விலையில்லா விருந்தகத்தை அறிமுகப்படுத்தியது விஜய் மக்கள் இயக்கம். அதனை தொடர்ந்து பள்ளி மாணவர்களுக்கு இலவச எழுது பொருள்கள் கொடுத்து உதவினார்கள்... மருத்துவ உதவி செய்ய வேண்டும் என்ற நோக்கத்தில் இலவச மருந்தகத்தையும் தொடங்கி நடத்தி வருகின்றார்கள்..குழந்தைகளுக்கான சத்துணவு பொருட்களான பால், முட்டை, ரொட்டி வழங்குதல், ஏழை குழந்தைகளுக்கான இரவு நேர பயிலகம் என யாரும் எதிர்பாராத இலவசங்களை கொடுத்து பெற்றோர்கள் மனதில் தனி இடம் பிடித்தனர்.

இப்படியாக இலவசங்களை வாரி வழங்கிய மக்கள் இயக்கம், தலைநகரில் தங்களது இலவச சட்ட ஆலோசனை மையத்தை திறந்து வைத்தார்கள்.கந்து வட்டி பிரச்னை துவங்கி, பெண்களுக்கு எதிரான வன்கொடுமை வரை அனைத்து பிரச்னைகளுக்கும் இங்கு ஆலாசனை வழங்கப்படும்.அடுத்த அதிரடியாக, கர்ப்பிணி பெண்களுக்கான இலவச ஆட்டோ சேவையை துவங்கி வைத்துள்ளது, சிதம்பரம் பகுதியை சேர்ந்த விஜய் மக்கள் இயக்கம்.சிதம்பரத்தில், 5 கிலோ மீட்டர் சுற்றளவில், மருத்துவ மனைக்கு செல்லும் கர்ப்பிணிகள் இந்த சேவையை பயன்படுத்திக் கொள்ளலாம் எனவும், தொடர்பு கொள்ள அழைப்பு எண்ணையும் வழங்கியுள்ளனர். ஒரு கர்ப்பிணி பெண்ணை ரிப்பன் வெட்டி சேவையை துவக்கி வைத்த நெகிழ்ச்சி சம்பவமும் அங்கே அரங்கேறியது.

ஒரே கல்லில் இரண்டு மாங்காய் என்பது போல, லியோ பட புரோமோஷன், அரசியல் பயணம் என இரண்டுக்குமே இலவசத்தை கொடுத்து மக்களின் கவனத்தை ஈர்த்து வருகின்றது விஜய் மக்கள் இயக்கம்.