மது அருந்தியதும் மயங்கி விழுந்து பறிபோன உயிர்? - தகவல் சொன்னவருக்கு விழுந்த சரமாரி அடி

திருப்பத்தூர் மாவட்டம் சிவராஜ்பேட்டைய சேர்ந்த ஸ்ரீதர், அதே பகுதியைச் சேர்ந்த வெங்கடேசன் என்பவருடன் கடந்த இரு தினங்களுக்கு முன் மது அருந்தி இருக்கிறார். அப்போது ஸ்ரீதர் மது போதையில் மயங்கி தரையில் விழுந்ததால் அவரது குடும்பத்தினரிடம் தகவலை வெங்கடேசன் கூறி இருக்கிறார். இதனைத் தொடர்ந்து குடும்பத்தினர் சம்பவ இடத்திற்கு சென்று தேடிய போது ஸ்ரீதர் கிடைக்கவில்லை என கூறப்படுகிறது. இந்த நிலையில் மது அருந்திய இடத்திற்கு அருகே உள்ள கிணற்றில் ஸ்ரீதர் சடலமாக மிதப்பதாக அக்கம்பக்கத்தினர் போலீசாருக்கு தகவல் தெரிவித்ததன் அடிப்படையில் தீயணைப்புத் துறையினர் உதவியுடன் ஸ்ரீதரின் உடலை மீட்டனர். இதனிடையே சம்பவ இடத்திற்கு வந்த வெங்கடேசனை ஸ்ரீதரின் உறவினர்கள் சரமாரியாகத் தாக்கியதால் பரபரப்பு ஏற்பட்டது. இதனைத் தொடர்ந்து போலீசார் வெங்கடேசனை காவல் நிலையம் அழைத்துச் சென்று கொலையா அல்லது விபத்தா என்ற கோணத்தில் விசாரணை நடத்தி வருகின்றனர்.