பட்டப்பகலில் வீட்டில் புகுந்த திருடன்... வசமாக சிக்கிய கொள்ளையன்.. திணற திணற அடித்த மக்கள்

திருவள்ளூரில் பட்டப்பகலில் வீட்டின் உள்ளே புகுந்த திருடனை, வீட்டிற்குள் வைத்து பூட்டிய பொதுமக்கள் போலீசாரிடம் ஒப்படைத்தனர்.

கனகவல்லிபுரத்தைச் சேர்ந்த முதியவர் கிருபாகரன்... இவரது மூத்த மகன் தாமோதரனும் இளைய மகன் அனுவும் வீட்டின் மேல்தளத்தில் வசிக்க, கீழ்தளத்தில் கிருபாகரன் தனியாக வசித்து வருகிறார். இந்நிலையில், கிருபாகரன் அருகே உள்ள கடைக்குச் சென்றபோது, கீழ்தளத்தில் ஏதோ உடைக்கும் சத்தம் கேட்டுள்ளது. உடனடியாக மேல்தளத்தில் உள்ளவர்கள் வந்து பார்த்தபோது, கடப்பாறையால் வீட்டின் உள்கதவுகளை திருடன் உடைத்தது, தெரியவந்துள்ளது. இதனையடுத்து அப்பகுதி மக்கள், வீட்டின் கதவுகளை வெளியில் பூட்டிவிட்டு, திருவள்ளூர் போலீசாரிடம் தகவல் தெரிவித்துள்ளனர். வீட்டிற்குள் வசமாக சிக்கிக் கொண்ட திருடனை போலீசார் கைது செய்தனர். கைதான திருடன் கிண்டியைச் சேர்ந்த அரவிந்தன் என்பதும், சில தினங்களுக்கு முன்பு வேறொரு வழக்கில் ஜாமினில் வெளிவந்ததும் தெரியவந்தது. இந்த சம்பவம் அப்பகுதியில் பரபரப்பை ஏற்படுத்தியது.