மீனவர்கள் வாழ்வாதாரத்தை முடக்கிய இலங்கை கடற்படை - வேதனையில் தமிழக மீனவர்கள்..

இலங்கை கடற்பரப்பில் சீன உளவு கப்பல் நங்கூரமிட்டு நிறுத்தப்பட்டுள்ளது. இதையடுத்து, இலங்கை கடற்படையினர் இலங்கை கடல் பகுதியில் தீவிர கண்காணிப்பில் ஈடுபட்டனர்.

இந்நிலையில், ராமேஸ்வரம் துறைமுகத்தில் இருந்து 400க்கும் மேற்பட்ட விசைப்படகுகளில் மீனவர்கள் மீன்பிடிக்க கடலுக்குச் சென்றனர். தலைமன்னார் - தனுஷ்கோடி இடையே மீன்பிடித்தபோது, அங்கு வந்த இலங்கை கடற்படையினர், எல்லை தாண்டி மீன்பிடித்ததாகக்கூறி, 3 விசைப்படகுகள் மற்றும் அதிலிருந்த 23 மீனவர்களை கைது செய்தனர். இதேபோல், நெடுந்தீவு அருகே 2 விசைப்படகுகளில் மீன் பிடித்த 14 மீனவர்களை இலங்கை கடற்படையினர் சிறைபிடித்து, காங்கேசன் துறைமுகத்திற்கு கொண்டு சென்றனர். ஒரே நாளில் 5 விசைப்படகுகள், 37 மீனவர்களை இலங்கை கடற்படையினர் கைது செய்ததால் ராமேஸ்வரம் மீனவர்கள் கவலை அடைந்துள்ளனர். கடந்த 14ம் தேதிமுதல் இதுவரை 10 விசைப்படகுகள் மற்றும் 64 மீனவர்கள் சிறைபிடிக்கப்பட்டுள்ளது குறிப்பிடத்தக்கது.