போலீசுக்கு பயந்த சிறுவன் - குளத்தில் குதித்து உயிரிழப்பு?

கோவை சுங்கம் பகுதியில் கடந்த வியாழக்கிழமை இரவு போலீசார் ரோந்து பணியில் ஈடுபட்டிருந்தனர். அப்போது சந்தேகத்திற்கிடமான வகையில் சுற்றி திரிந்த 2 இளைஞர்களையும், 1 சிறுவனையும் பிடித்து விசாரணை நடத்தியுள்ளனர். அப்போது போலீஸ் விசாரணைக்கு பயந்த சிறுவன், சுங்கம் உக்கடம் சாலையிலுள்ள வாலாங்குளத்தில் குதித்து தப்பிக்க முயன்றபோது நீரில் மூழ்கியுள்ளார். தொடர்ந்து அங்கு வந்த காவல்துறையினர், உடலை தேடிய நிலையில், சிறுவன் சடலமாக மீட்கபட்டான். உயிரிழந்தவர் 17 வயது பள்ளி சிறுவன் என தெரியவந்துள்ளது. மற்ற இரண்டு பேரும், தனியார் கல்லூரியில் முதலாம் ஆண்டு படித்து வருவதும் விசாரணையில் தெரிய வந்துள்ளது. மேலும், மது குடித்ததை காவல் துறையினர் கண்டுபிடித்து விடுவார்கள் என்ற பயத்தில், சிறுவன் வாலாங்குளத்தில் விழுந்து உயரிழந்திருக்கலாம் என கூறப்படுகிறது.