திமுக மூத்த நிர்வாகி வீட்டில் கைவரிசை.. ஸ்கெட்ச் போட்ட திருடன்.. CCTV இல்லாததால் திணறும் அதிகாரிகள்

ஈரோடு மாணிக்கம்பாளையம் விஐபி நகரில் வசித்து வரும் சுப்புலட்சுமி ஜெகதீசனுக்கு மொடக்குறிச்சி அருகே சின்னம்மாபுரம் கிராமம் மினி காடு என்ற இடத்தில் 25 ஏக்கரில் தோட்டத்துடன் கூடிய பண்ணை வீடு உள்ளது. இந்த வீட்டில் சுப்புலட்சுமி ஜெகதீசன் வாரத்தில் இரண்டு நாட்கள் குடும்பத்துடன் தங்குவது வழக்கம். இந்த தோட்டத்தை பராமரித்து வரும் சின்னம்மாபுரத்தை சேர்ந்த கோவிந்தராஜ், நேற்று இரவு வழக்கம்போல் வீட்டை பூட்டி விட்டு சென்று விட்டார். காலையில் வீட்டின் பூட்டு உடைக்கப்பட்டிருப்பதாக சுப்புலட்சுமியின் கணவர் ஜெகதீசனுக்கு தகவல் வந்தது. அவருடன் போலீசாரும் வீட்டிற்குள் சென்று பார்த்தபோது வீட்டில் இருந்த 50 ஆயிரம் ரூபாய் பணம் திருடு போயிருப்பது தெரியவந்தது. கைரேகை நிபுணர்கள் வீட்டில் பதிவாகியிருந்த தடயங்களை சேகரித்து சென்றனர். சிசிடிவி கேமரா பொருத்தப்படாததால் கொள்ளையர்களை பிடிப்பதில் சிக்கல் ஏற்பட்டுள்ளது.