ராயல் என்ஃபீல்டு ஷோரூமில் நடந்த பகீர்.. புது பைக் வாங்குபவர்களே உஷார்..!

செங்கல்பட்டு மாவட்டம் கூடுவாஞ்சேரி ராயல் என்ஃபீல்ட் ஷோரூமில் நூதன முறையில் சுமார் 15 லட்சம் ரூபாய் திருட்டில் ஈடுபட்ட மேலாளர் கைது செய்யப்பட்டார்.

கூடுவாஞ்சேரியில் உள்ள ராயல் என்ஃபீல்டு ஷோ ரூம் மேலாளராக ஈரோட்டைச் சேர்ந்த தமிழரசன் பணிபுரிந்து வந்துள்ளார். இவர் புதிதாக பைக் வாங்க வருபவர்கள் கட்டும் முன்பணத்தை, தனது சொந்த செலவிற்கு பயன்படுத்தி வந்துள்ளார். தான் செலவு செய்யும் பணத்தை, மீண்டும் புதிதாக பைக், புக் செய்ய வருபவர்கள் கட்டும் முன்பணம் மூலம் சரிசெய்து வந்துள்ளார். 15 லட்சம் ரூபாய் வரை இவர் கையாடல் செய்த நிலையில், இது தொடர்பாக ஷோ ரூம் உரிமையாளர் கேட்டபோது தமிழரசன் தலைமறைவாகியுள்ளார். இந்நிலையில் ஷோ ரூம் உரிமையாளர் அளித்த புகாரின் அடிப்படையில் தலைமறைவாகி இருந்த தமிழரசனை போலீசார் கைது செய்தனர். அவரிடம் இருந்து 95 ஆயிரம் ரூபாயை பறிமுதல் செய்த போலீசார், நீதிமன்றத்தில் ஆஜர்படுத்தி சிறையில் அடைத்தனர்.