பொங்கல் சிறப்பு பேருந்துகள்.. எந்தெந்த பஸ் ஸ்டாண்டிலிருந்து புறப்படும்? - முக்கிய அறிவிப்பு

பொங்கல் பண்டிகையை முன்னிட்டு, சென்னையில் 6 பேருந்து நிலையங்களுக்கு செல்வதற்கு ஏதுவாக 450 சிறப்பு இணைப்பு பேருந்துகள் இயக்கப்படும் என்று மாநகர போக்குவரத்து கழகம் தெரிவித்துள்ளது.

பொங்கல் பண்டிகையை முன்னிட்டு, சென்னை மாநகரில் போக்குவரத்து நெரிசலை குறைக்கவும், வெளியூர் செல்லும் பயணிகளின் வசதிக்காகவும், இன்று முதல் 14-ஆம் தேதி வரை 3 நாட்களுக்கு சிறப்பு பேருந்துகள் இயக்கப்படுகின்றன. இந்த பேருந்துகள், கோயம்பேடு, கிளாம்பாக்கம், மாதவரம், பூந்தமல்லி, தாம்பரம், கே.கே.நகர் ஆகிய 6 பேருந்து நிலையங்களில் இருந்து இயக்கப்பட உள்ளன. இந்த பேருந்து நிலையங்களுக்குச் செல்வதற்கு ஏதுவாக, இன்று முதல் 14-ஆம் தேதி வரை 450 சிறப்பு பேருந்துகள் இயக்கப்பட உள்ளன. இதேபோல், பொங்கல் முடிந்து சென்னை திரும்பும் மக்களின் நலனுக்காக வரும் புதன் மற்றும் வியாழக்கிழமை மாலை நேரத்தில் 50 பேருந்துகளும், வியாழக்கிழமை இரவு மற்றும் வெள்ளிக்கிழமை அதிகாலை 125 பேருந்துகளும் இயக்கப்படும் என்று சென்னை மாநகர போக்குவரத்து கழகம் தெரிவித்துள்ளது