பூட்டப்பட்ட பச்சையப்பன் காலேஜ் வாசல்... உடனே மாணவர்கள் செய்த செயல் - சென்னையில் பரபரப்பு

சென்னை பச்சையப்பன் கல்லூரியில் மாணவர்கள் சார்பில் பொங்கல் விழாவுக்கு ஏற்பாடு செய்யப்பட்டது. இதில் பங்கேற்க மாணவர்கள் பலர் காலையிலேயே வந்தனர். இந்நிலையில், காலை 10 மணிக்கு மேல் கல்லூரிக்கு வருகை தந்த மாணவர்களை போலீசார் அனுமதிக்கவில்லை என கூறப்படுகிறது. இதனால் ஆத்திரமடைந்த மாணவர்கள், கல்லூரி கேட்டின் மீது ஏறி, தாங்கள் பயணம் செய்யும் வழித்தடம் மற்றும் பேருந்து எண்ணை குறிக்கும் பேனர்களை கட்டினர். பின்னர் போலீஸ் அறிவுறுத்தலின்பேரில் அங்கிருந்து கலைந்து சென்றனர். இதேபோல், மாநிலக்கல்லூரி மாணவர்கள் பொங்கல் கொண்டாடினர். இதில், முன்னாள் மாணவர்கள் இருவர் உட்பட 10 பேர் அடையாள அட்டையின்றி கல்லூரிக்குள் நுழைய முயன்றதால் பரபரப்பு நிலவியது. அவர்களிடம் போலீசார் விசாரணை நடத்தினர். இன்ஸ்டாகிராம், முகநூல் மூலம் முன்னாள் கல்லூரி மாணவர்களுக்கும், ரூட்டு தலைவருக்கும் அழைப்பு விடப்பட்டு, பலர் குவிந்த நிலையில், அடையாள அட்டை வைத்திருந்தவர்கள் மட்டுமே அனுமதிக்கப்பட்டனர்.