மூதாட்டி கழுத்தறுத்து கொலை - நாமக்கல்லில் பரபரப்பு

நாமக்கல் மாவட்டம் பரமத்திவேலூர் அருகே மூதாட்டியை கழுத்தறுத்து கொன்ற கும்பல், அவரது கணவரை இரும்பு ராடால் தாக்கிய சம்பவம் அதிர்ச்சியை ஏற்படுத்தியுள்ளது.

குப்புச்சிபாளையம் கிராமத்தில் மூத்த தம்பதி சண்முகம்- நல்லம்மாள் ஆகியோர் தோட்டத்தில் தனியாக வசித்து வந்தனர். இவர்கள் உறங்கிக் கொண்டிருந்த போது மாடி வழியாக வீட்டிற்குள் புகுந்த மர்ம நபர்கள், சண்முகத்தை இரும்பு கம்பியால் தாக்கிவிட்டு, மூதாட்டியை கழுத்தறுத்து படுகொலை செய்துவிட்டு அங்கிருந்து தப்பிச் சென்றனர். அக்கம்பக்கத்தினர் அளித்த தகவலின்படி அங்கே வந்த போலீசார், பூட்டை உடைத்து, முதியவரை மீட்டு மருத்துவமனைக்கு அனுப்பி வைத்தனர். உயிருக்கு ஆபத்து இருப்பதாக முதியவர் சண்முகம் புகார் அளித்த நிலையில், இந்த சம்பவம் நடைபெற்றதால், முன்விரோதம் காரணமாக மூதாட்டி கொல்லப்பட்டிருக்கலாம் என போலீசார் சந்தேகிக்கின்றனர். குற்றம் சம்பவம் குறித்து அறிந்த நாமக்கல் எஸ்பி, டிஎஸ்பி உள்ளிட்டோர், நிகழ்விடத்தை நேரில் பார்வையிட்டு விசாரணை நடத்தினர்.