மருந்துக்கடை ஊழியர் கடத்தல் - கல்லூரி மாணவர்கள் இருவர் கைது

சென்னையில் மருந்துக்கடை ஊழியர் காரில் கடத்தப்பட்ட வழக்கில், ஆந்திராவை சேர்ந்த கல்லூரி மாணவர்கள் இருவரை போலீசார் கைது செய்திருக்கின்றனர்.

ஆந்திராவை சேர்ந்தவர் தினேஷ். சென்னை, வட பழனியில் உள்ள பிரபல தனியார் மாலில் இயங்கி வரும் மருந்துக்கடையில் வேலை பார்த்து வருகிறார். இவர் இரு நாள்களுக்கு முன் தன் நண்பருடன் பைக்கில் சென்றபோது மர்மநபர்களால் வழிமறித்து தாக்கப்பட்டு காரில் கடத்தப்பட்டார். இது குறித்தான சிசிடிவி வெளியாகி பரபரப்பை ஏற்படுத்தி இருந்தது. விசாரணையில், சுரேந்திரன் என்பவரிடம் வாங்கிய 30 லட்ச ரூபாய் பணத்தை, தினேஷ் ஆன்லைன் சூதாட்டத்தில் இழந்து தலைமறைவானதாக கூறப்படுகிறது. இதனால், தினேஷை கும்பல் கடத்திச் சென்று ஜிபே மூலம் 40 ஆயிரம் பணம் பறித்ததாக கூறப்படுகிறது. இந்நிலையில் சூலூர் பேட்டையில் ரோந்து பணியில் ஈடுபட்ட போலீசாரிடம் கும்பல் சிக்கியிருக்கிறது. இதில், கல்லூரி மாணவர்கள் இருவரை கைது செய்து தினேஷை மீட்டிருக்கும் போலீசார், தப்பியோடிய ஏழு பேரை வலைவீசி தேடி வருகின்றனர்.