ஓடும் பைக்கில் செயின் பறித்த திருடனை அலறவிட்ட பெண்.. தப்பியோடிய திருடன்.. சிக்கியது எப்படி?

பைக்கில் சென்ற தம்பதியிடம் செயின் பறிப்பில் ஈடுபட்டு தப்பியோடிய திருடன், மருத்துவமனையில் சிக்கிய சுவாரஸ்யமான சம்பவம் கடலூரில் நடந்துள்ளது.

புதுச்சேரியைச் சேர்ந்த சந்தோஷ்-சுதா தம்பதி தங்களது குழந்தைகள் இருவருடன், கடலூர் அடுத்த பொன்னங்திட்டு பகுதிக்கு இருசக்கர வாகனத்தில் சென்று கொண்டிருந்தனர். ஆலப்பாக்கம் மேம்பாலத்தில் சென்றபோது, பின்னால் இருசக்கர வாகனத்தில் வந்த இளைஞர், திடீரென சுதா கழுத்தில் இருந்த தங்கச் செயினை பறிக்க முயன்றார். சுதாரித்துக் கொண்ட சுதா, இளைஞரின் சட்டையை பிடிக்க, இருசக்கர வாகனங்களில் சென்ற இருவரும் சாலையில் தடுமாறி விழுந்தனர். இதில் சந்தோஷ்- சுதா தம்பதியும் குழந்தைகளும் காயமடைந்தன. அதே நேரத்தில் கீழே விழுந்த இளைஞர் காயத்துடன் தப்பினார். சந்தோஷ், சுதா மற்றும் அவரது இரண்டு குழந்தைகள் சிகிச்சைக்காக கடலூர் அரசு மருத்துவமனையில் சேர்க்கப்பட்டனர். அவர்களிடம் போலீசார் விசாரணை நடத்தி நிலையில், சில மணி நேரத்தில் விபத்தில் காயமடைந்த இளைஞர் ஒருவர் கடலூர் அரசு மருத்துவமனையில் அனுமதிக்கப்பட்டார். சந்தேகமடைந்த போலீசார், இளைஞரை புகைப்படம் எடுத்து தம்பதியிடம் காட்டவே, செயின் பறிப்பில் ஈடுபட்டது அஜித்குமார் என்பது தெரியவந்தது. இதுகுறித்து போலீசார் விசாரித்து வருகின்றனர்.