ஒரே ஜம்ப்பில் கோழியை லபக்கென்று பிடித்த சிறுத்தை.. சிசிடிவியை பார்த்து பீதியில் மக்கள்

கோவை அருகே குடியிருப்புக்குள் புகுந்து கோழி ஒன்றை சிறுத்தை வேட்டையாடிய சம்பவம் மக்களை பீதியில் உறையச் செய்துள்ளது...

கோவை கணுவாய் அருகே உள்ள பழனியப்பா லேஅவுட் பகுதியில் சக்திவேல் என்பவர் தனது வீட்டில் கோழிகளை வளர்த்து வருகிறார். நேற்று இரவு கோழிகள் தொடர்ந்து சத்தமிட்டதால் சந்தேகம் அடைந்த சக்திவேல் மற்றும் அவரது குடும்பத்தினர் வெளியில் வந்து பார்த்துள்ளனர். அப்போது ஒரு கோழி மாயமாகி இருப்பது தெரிய வந்தது. இதையடுத்து வீட்டில் பொருத்தப்பட்டுள்ள சிசிடிவி கேமராவைப் பார்த்த போது, சிறுத்தை ஒன்று வீட்டிற்குள் புகுந்து கோழியை வேட்டையாடி தப்பிச் செல்லும் காட்சிகள் பதிவாகி இருந்தன... இதனால் அதிர்ச்சி அடைந்த சக்திவேல், இது தொடர்பாக உடனடியாக வனத்துறைக்கு தகவல் தெரிவித்துள்ளார். கணுவாயில் குடியிருப்புகள் அதிகம் நிறைந்துள்ள இந்த பகுதியில் அருகே ஆங்காங்கே புதர்கள் தென்படுவதால், அதில் சிறுத்தை பதுங்கி இருக்கலாம் என அப்பகுதியைச் சேர்ந்த மக்கள் அச்சம் தெரிவித்துள்ளனர். எனவே சிறுத்தை நடமாட்டத்தைக் கண்காணித்து அதனை அடர்ந்த வனப்பகுதிக்குள் விரட்ட நடவடிக்கை எடுக்க வேண்டும் என பொதுமக்கள் கோரிக்கை விடுத்துள்ளனர்.